ਸ੍ਰੀਨਗਰ ਦੇ ਲਾਲਚੌਕ ਦੇ ਨਾਲ ਲਗਦੇ ਮਾਈਸੂਮਾ ਇਲਾਕੇ ‘ਚ ਦਿਨ ਦਿਹਾੜੇ ਅੱਤਵਾਦੀਆਂ ਨੇ ਸੀ.ਆਰ.ਪੀ.ਐਫ. ਦੇ 2 ਜਵਾਨਾਂ ‘ਤੇ ਨੇੜਿਓਂ ਅੰਨ੍ਹੇਵਾਹ ਗੋਲੀਆਂ ਚਲਾ ਦਿੱਤੀਆਂ। ਜਿਸ ਕਰਕੇ ਦੋਵੇਂ ਜਵਾਨ ਗੰਭੀਰ ਜ਼ਖ਼ਮੀ ਹੋ ਗਏ ਜਿਨ੍ਹਾਂ ‘ਚੋਂ ਇਕ ਹਸਪਤਾਲ ‘ਚ ਇਲਾਜ ਅਧੀਨ ਦਮ ਤੋੜ ਗਿਆ। ਉਧਰ ਪੁਲਵਾਮਾ ਇਲਾਕੇ ‘ਚ ਅਜਿਹੇ ਇਕ ਹਮਲੇ ‘ਚ ਅੱਤਵਾਦੀਆਂ ਨੇ 2 ਪ੍ਰਵਾਸੀ ਮਜ਼ੂਦਰਾਂ ਨੂੰ ਗੋਲੀਆਂ ਮਾਰ ਕੇ ਜ਼ਖ਼ਮੀ ਕਰ ਦਿੱਤਾ। ਪੁਲਿਸ ਸੂਤਰਾਂ ਅਨੁਸਾਰ ਸ੍ਰੀਨਗਰ ਦੇ ਭੀੜ ਭੜਕੇ ਇਲਾਕੇ ‘ਚ ਸ਼ੱਕੀ ਅੱਤਵਾਦੀਆਂ ਨੇ ਮਾਈਸੂਮਾ ਇਲਾਕੇ ‘ਚ ਡਾਰ ਇਮਾਰਤ ਨੇੜੇ ਡਿਊਟੀ ਦੇ ਰਹੇ 2 ਜਵਾਨਾਂ ‘ਤੇ ਗੋਲੀਆਂ ਚਲਾ ਦਿੱਤੀਆਂ। ਜਿਸ ਕਾਰਨ ਉਹ ਗੰਭੀਰ ਜ਼ਖ਼ਮੀ ਹੋ ਗਏ। ਉਨ੍ਹਾਂ ਨੂੰ ਸ੍ਰੀਨਗਰ ਦੇ ਨਜ਼ਦੀਕ ਐਸ.ਐਮ.ਐਚ.ਐਸ. ਹਸਪਤਾਲ ਪਹੁੰਚਾਇਆ ਗਿਆ, ਜਿਥੇ ਮੈਡੀਕਲ ਸੁਪਰਡੈਂਟ ਕਵਲਜੀਤ ਸਿੰਘ ਮੁਤਾਬਿਕ ਜਵਾਨ ਜਿਸ ਦੀ ਪਹਿਚਾਣ ਕਾਂਸਟੇਬਲ ਵਿਸ਼ਾਲ ਵਜੋਂ ਹੋਈ ਗਈ ਹੈ, ਜ਼ਖ਼ਮਾਂ ਦੀ ਤਾਬ ਨਾ ਝਲਦੇ ਦਮ ਤੋੜ ਗਿਆ ਜਦਕਿ ਦੂਜਾ ਜਵਾਨ ਜ਼ੇਰੇ ਇਲਾਜ ਹੈ। ਉਸ ਦੀ ਹਾਲਤ ਸਥਿਰ ਦੱਸੀ ਜਾ ਰਹੀ ਹੈ। ਪੁਲਿਸ ਅਤੇ ਸੀ.ਆਰ.ਪੀ.ਐਫ. ਦੇ ਉੱਚ ਅਧਿਕਾਰੀ ਮੌਕੇ ‘ਤੇ ਪੁੱਜੇ ਅਤੇ ਇਲਾਕੇ ਨੂੰ ਘੇਰ ਕੇ ਤਲਾਸ਼ੀ ਮੁਹਿੰਮ ਚਲਾਈ ਹੈ। ਇਧਰ ਪੁਲਵਾਮਾ ਦੇ ਲਾਜੋਰਾ ਇਲਾਕੇ ‘ਚ ਸ਼ੱਕੀ ਅੱਤਵਾਦੀਆਂ ਨੇ ਬਿਹਾਰ ਨਾਲ ਸੰਬੰਧਿਤ 2 ਪ੍ਰਵਾਸੀ ਮਜ਼ਦੂਰਾਂ ‘ਤੇ ਗੋਲੀਆਂ ਚਲਾ ਕੇ ਜ਼ਖ਼ਮੀ ਕਰ ਦਿੱਤਾ। ਜਿਨ੍ਹਾਂ ਦੀ ਪਹਿਚਾਣ ਪਤਲੇਸ਼ਵਰ ਕੁਮਾਰ ਅਤੇ ਜਾਕੋ ਚੌਧਰੀ ਦੋਵੇਂ ਵਾਸੀ ਬਿਹਾਰ ਜ਼ਖ਼ਮੀ ਹੋ ਗਏ। ਜਿਨ੍ਹਾਂ ਨੂੰ ਹਸਪਤਾਲ ਦਾਖ਼ਲ ਕਰਵਾ ਦਿੱਤਾ ਗਿਆ ਹੈ।
ਸ਼ੋਪੀਆਂ ‘ਚ ਕਸ਼ਮੀਰੀ ਪੰਡਿਤ ਨੂੰ ਬਣਾਇਆ ਨਿਸ਼ਾਨਾ
ਦੱਖਣੀ ਕਸ਼ਮੀਰ ਦੇ ਜ਼ਿਲ੍ਹਾ ਸ਼ੋਪੀਆਂ ‘ਚ ਅੱਤਵਾਦੀਆਂ ਨੇ ਇਕ ਦਵਾਈ ਵਿਕਰੇਤਾ ਨੂੰ ਗੋਲੀ ਮਾਰ ਕੇ ਜ਼ਖਮੀ ਕਰ ਦਿੱਤਾ। ਸ਼ੋਪੀਆਂ ਦੇ ਹਰਮੇਨ ਦੇ ਛੋਟੀਗਾਮ ਪਿੰਡ ‘ਚ ਕਸ਼ਮੀਰੀ ਪੰਡਿਤ ਸੋਨੂੰ ਕੁਮਾਰ ਬਾਲਾਜੀ ਪੁੱਤਰ ਜਾਨਕੀ ਨਾਥ ਦਵਾਈ ਵਿਕਰੇਤਾ ‘ਤੇ ਦੇਰ ਸ਼ਾਮ ਅੱਤਵਾਦੀਆਂ ਨੇ ਆਪਣਾ ਨਿਸ਼ਾਨਾ ਬਣਾਇਆ। ਉਸ ਨੂੰ ਜ਼ਖ਼ਮੀ ਹਾਲਤ ‘ਚ ਪਹਿਲਾਂ ਸਬ ਜ਼ਿਲ੍ਹਾ ਹਸਪਤਾਲ ‘ਚ ਲਿਆਂਦਾ ਗਿਆ ਤੇ ਮੁਢਲੀ ਸਹਾਇਤਾ ਦੇਣ ਉਪਰੰਤ ਸ੍ਰੀਨਗਰ ਦੇ 92 ਬੇਸ ਫੌਜੀ ਹਸਪਤਾਲ ਲਿਜਾਇਆ ਗਿਆ ਹੈ।
