ਮੁੱਖ ਮੰਤਰੀ ਅਮਰਿੰਦਰ ਸਿੰਘ ਦੇ ਸ਼ਹਿਰ ’ਚ ਰੁਜ਼ਗਾਰ ਪ੍ਰਾਪਤੀ ਲਈ ਦੋ ਸੌ ਫੁੱਟ ਉੱਚੇ ਟਾਵਰ ’ਤੇ ਚੜ੍ਹੇ ਸੰਘਰਸ਼ੀ ਨੂੰ ਅੱਜ ਟਾਵਰ ’ਤੇ ਚੜ੍ਹਿਆਂ ਸੌ ਦਿਨ ਹੋ ਗਏ ਹਨ। ਪੰਜਾਬ ਸਰਕਾਰ ਵੱਲੋਂ ਕੋਈ ਹੁੰਗਾਰਾ ਨਾ ਮਿਲਣ ਦੇ ਰੋਸ ਵਜੋਂ ਸੰਘਰਸ਼ੀ ਸੁਰਿੰਦਰਪਾਲ ਪਿਛਲੇ ਨੌਂ ਦਿਨਾਂ ਤੋਂ ਮਰਨ ਵਰਤ ’ਤੇ ਹੈ। ਦਿਨੋਂ ਦਿਨ ਵਿਗੜ ਰਹੀ ਸਿਹਤ ਦੇ ਬਾਵਜੂਦ ਉਹ ਆਪਣੀਆਂ ਮੰਗਾਂ ਦੇ ਪ੍ਰਵਾਨ ਹੋਣ ਤੱਕ ਸੰਘਰਸ਼ ’ਤੇ ਡਟੇ ਰਹਿਣ ਲਈ ਕਾਇਮ ਹੈ।
ਇਸ ਟਾਵਰ ਸੰਘਰਸ਼ ਬਾਰੇ ਬੇਰੁਜ਼ਗਾਰ ਈ.ਟੀ.ਟੀ. ਟੈੱਟ ਪਾਸ ਅਧਿਆਪਕ ਯੂਨੀਅਨ ਨੇ ਕਿਹਾ ਕਿ ਜਦੋਂ ਉਨ੍ਹਾਂ 2016 ਵਿੱਚ ਸਾਬਕਾ ਬਾਦਲ ਸਰਕਾਰ ਦੌਰਾਨ ਜੈ ਸਿੰਘ ਵਾਲਾ ਬਠਿੰਡਾ ’ਚ ਟਾਵਰ ’ਤੇ ਚੜ੍ਹ ਕੇ ਸੰਘਰਸ਼ ਵਿੱਢਿਆ ਸੀ ਤਾਂ ਉਦੋਂ ਪਟਿਆਲਾ ਤੋਂ ਖ਼ੁਦ ਪਰਨੀਤ ਕੌਰ ਜੈ ਸਿੰਘ ਵਾਲਾ ਵਿਖੇ ਟਾਵਰ ਸੰਘਰਸ਼ੀਆਂ ਦਾ ਹਾਲ ਪੁੱਛਣ ਗਏ ਸਨ। ਉਦੋਂ ਉਨ੍ਹਾਂ ਟਾਵਰ ਸੰਘਰਸ਼ੀਆਂ ਦੀ ਹੌਂਸਲਾ ਅਫਜ਼ਾਈ ਕੀਤੀ ਤੇ ਭਰੋਸਾ ਦਿਵਾਇਆ ਕਿ ਕਾਂਗਰਸ ਸਰਕਾਰ ਆਉਣ ’ਤੇ ਉਨ੍ਹਾਂ ਦੀਆਂ ਮੰਗਾਂ ਪ੍ਰਵਾਨ ਕਰ ਕੇ ਨੌਕਰੀਆਂ ਦਿੱਤੀਆਂ ਜਾਣਗੀਆਂ। ਯੂਨੀਅਨ ਦੇ ਮੌਜੂਦਾ ਪ੍ਰਧਾਨ ਦੀਪਕ ਕੰਬੋਜ ਤੇ ਪ੍ਰੈਸ ਸਕੱਤਰ ਦੀਪ ਬਨਾਰਸੀ ਨੇ ਆਖਿਆ ਕਿ ਪਰਨੀਤ ਕੌਰ ਅਕਾਲੀ ਸਰਕਾਰ ਵੇਲੇ ਤਾਂ ਜੈ ਸਿੰਘ ਵਾਲਾ ਪਹੁੰਚ ਗਏ ਸਨ ਪਰ ਹੁਣ ਜਦੋਂ ਟਾਵਰ ਸੰਘਰਸ਼ੀਆਂ ਨੇ ਪਟਿਆਲਾ ’ਚ ਸੰਘਰਸ਼ ਵਿੱਢਿਆ ਹੋਇਆ ਹੈ ਤਾਂ ਪਰਨੀਤ ਕੌਰ ਨੂੰ ਕੋਈ ਪ੍ਰਵਾਹ ਨਹੀਂ ਹੈ। ਆਗੂਆਂ ਨੇ ਦੱਸਿਆ ਕਿ ਜਦੋਂ ਟਾਵਰ ਸੰਘਰਸ਼ ਦੇ ਦੋ ਮਹੀਨੇ ਹੋਏ ਸਨ ਤਾਂ ਉਸ ਦਿਨ ਪਟਿਆਲਾ ਬਲਾਕ ਕਾਂਗਰਸ ਦਾ ਇੱਕ ਸੀਨੀਅਰ ਆਗੂ ਟਾਵਰ ਹੇਠਾਂ ਪੁੱਜਿਆ ਸੀ ਤੇ ਉਸ ਦਾ ਕਹਿਣਾ ਸੀ ਕਿ ਉਹ ਸਾਰੀ ਸਥਿਤ ਪਰਨੀਤ ਕੌਰ ਨੂੰ ਦੱਸਣਗੇ ਤੇ ਬੀਬੀ ਪਰਨੀਤ ਕੌਰ ਇਸ ਮਾਮਲੇ ਨੂੰ ਮੁੱਖ ਮੰਤਰੀ ਕੈਪਟਨ ਅਮਰਿੰਦਰ ਸਿੰਘ ਕੋਲ ਉਠਾ ਕੇ ਮਸਲੇ ਦਾ ਜਲਦੀ ਹੱਲ ਕਰਵਾ ਦੇਣਗੇ ਪਰ ਟਾਵਰ ਸੰਘਰਸ਼ ਦੇ 100 ਦਿਨ ਹੋਣ ’ਤੇ ਵੀ ਕਿਸੇ ਸੱਤਾਧਿਰ ਆਗੂ ਨੇ ਮੁੜ ਸੰਘਰਸ਼ ਦੀ ਸਾਰ ਲੈਣੀ ਜ਼ਰੁਰੀ ਨਹੀਂ ਸਮਝੀ, ਜਿਸ ਦਾ ਬੇਰੁਜ਼ਗਾਰ ਅਧਿਆਪਕਾਂ ’ਚ ਰੋਸ ਹੈ।
ਦੀਪਕ ਕੰਬੋਜ ਨੇ ਆਖਿਆ ਕਿ ਕੈਪਟਨ ਸਰਕਾਰ ਨੇ ਵਾਅਦਿਆਂ ਮੁਤਾਬਕ ਬੇਰੁਜ਼ਗਾਰਾਂ ਨੂੰ ਰੁਜ਼ਗਾਰ ਤਾਂ ਕੀ ਦੇਣਾ ਸੀ ਉਲਟਾ ਪੁਲੀਸ ਉਨ੍ਹਾਂ ’ਤੇ ਪਰਚੇ ਕੀਤੇ ਜਾ ਰਹੇ ਹਨ। ਕੰਬੋਜ ਮੁਤਾਬਕ ਸੰਘਰਸ਼ ਸਬੰਧੀ ਉਸ ਦੇ ਇੱਕ ਪਰਚੇ ਦੀ ਚਾਰਜਸ਼ੀਟ ਵੀ ਪੇਸ਼ ਕਰ ਦਿੱਤੀ ਗਈ ਹੈ ਤੇ ਹੁਣ ਅਦਾਲਤੀ ਪੇਸ਼ੀਆਂ ਦਾ ਸਿਲਸਿਲਾ ਵੀ ਸ਼ੁਰੂ ਹੋ ਗਿਆ ਹੈ।