ਗੁਰੂਗ੍ਰਾਮ ਦੇ ਨਿੱਜੀ ਸਕੂਲਾਂ ਨੂੰ ਬੰਬ ਨਾਲ ਉਡਾਉਣ ਦੀ ਧਮਕੀ ਮਿਲਣ ਦਾ ਮਾਮਲਾ ਫਿਰ ਗਰਮਾ ਗਿਆ ਹੈ। ਸ਼ਹਿਰ ਦੇ ਇੱਕ ਨਾਮੀ ਨਿੱਜੀ ਸਕੂਲ ਨੂੰ ਈ-ਮੇਲ ਰਾਹੀਂ ਬੰਬ ਨਾਲ ਉਡਾਉਣ ਦੀ ਧਮਕੀ ਦਿੱਤੀ ਗਈ, ਜਿਸ ਤੋਂ ਬਾਅਦ ਪੂਰੇ ਇਲਾਕੇ ਵਿੱਚ ਦਹਿਸ਼ਤ ਦਾ ਮਾਹੌਲ ਬਣ ਗਿਆ।
ਸਵੇਰੇ ਸਕੂਲ ਖੁੱਲ੍ਹਣ ਵੇਲੇ ਜਦੋਂ ਇਹ ਈ-ਮੇਲ ਦੇਖੀ ਗਈ ਤਾਂ ਤੁਰੰਤ ਪੁਲਿਸ ਨੂੰ ਸੂਚਿਤ ਕੀਤਾ ਗਿਆ। ਸਾਵਧਾਨੀ ਵਜੋਂ ਬੱਚਿਆਂ ਦੀ ਛੁੱਟੀ ਕਰ ਦਿੱਤੀ ਗਈ। ਮੌਕੇ ‘ਤੇ ਪਹੁੰਚੀ ਪੁਲਿਸ, ਡੌਗ ਸਕੁਐਡ ਅਤੇ ਬੰਬ ਨਿਰੋਧਕ ਦਸਤੇ ਨੇ ਤਲਾਸ਼ੀ ਮੁਹਿੰਮ ਚਲਾਈ, ਹਾਲਾਂਕਿ ਕੋਈ ਵੀ ਸ਼ੱਕੀ ਵਸਤੂ ਬਰਾਮਦ ਨਹੀਂ ਹੋਈ।
ਪੁਲਿਸ ਅਨੁਸਾਰ ਡੀ.ਐਲ.ਐਫ. ਫੇਜ਼-1 ਥਾਣਾ ਖੇਤਰ ਦੇ ਬਲਿਆਵਾਸ ਸਥਿਤ ਪਾਥਵੇ ਵਰਲਡ ਸਕੂਲ ਨੂੰ ਰਾਤ ਕਰੀਬ ਡੇਢ ਵਜੇ ਇਹ ਈ-ਮੇਲ ਭੇਜੀ ਗਈ ਸੀ। ਸਵੇਰੇ ਜਦੋਂ ਸਕੂਲ ਪ੍ਰਬੰਧਕਾਂ ਨੇ ਮੇਲ ਦੇਖੀ ਤਾਂ ਭਾਜੜਾਂ ਪੈ ਗਈਆਂ। ਬੰਬ ਨਿਰੋਧਕ ਦਸਤੇ ਨੇ ਪੂਰੇ ਕੈਂਪਸ, ਕਲਾਸਰੂਮਾਂ ਅਤੇ ਲਾਇਬ੍ਰੇਰੀ ਦੀ ਬਾਰੀਕੀ ਨਾਲ ਜਾਂਚ ਕੀਤੀ।
ਮਾਪਿਆਂ ਨੂੰ ਸੂਚਿਤ ਕਰ ਕੇ ਕੀਤੀ ਗਈ ਜਲਦੀ ਛੁੱਟੀ
ਸਵੇਰੇ 11 ਵਜੇ ਹੀ ਮਾਪਿਆਂ ਨੂੰ ਮੈਸੇਜ ਭੇਜ ਕੇ ਬੱਚਿਆਂ ਨੂੰ ਘਰ ਲੈ ਜਾਣ ਲਈ ਕਿਹਾ ਗਿਆ। ਕਈ ਬੱਚਿਆਂ ਨੂੰ ਸਕੂਲ ਦੀਆਂ ਗੱਡੀਆਂ ਰਾਹੀਂ ਸੁਰੱਖਿਅਤ ਘਰ ਛੱਡਿਆ ਗਿਆ। ਸਾਈਬਰ ਸੈੱਲ ਹੁਣ ਇਸ ਗੱਲ ਦੀ ਜਾਂਚ ਕਰ ਰਿਹਾ ਹੈ ਕਿ ਇਹ ਮੇਲ ਕਿੱਥੋਂ ਅਤੇ ਕਿਸ ਨੇ ਭੇਜੀ ਹੈ।
ਦੋ ਮਹੀਨਿਆਂ ‘ਚ 6 ਤੋਂ ਵੱਧ ਵਾਰ ਮਿਲ ਚੁੱਕੀਆਂ ਹਨ ਧਮਕੀਆਂ
ਪਿਛਲੇ ਕੁਝ ਮਹੀਨਿਆਂ ਦੌਰਾਨ ਗੁਰੂਗ੍ਰਾਮ ਸਮੇਤ ਐਨ.ਸੀ.ਆਰ. (NCR) ਦੇ ਕਈ ਸਕੂਲਾਂ ਨੂੰ ਅਜਿਹੀਆਂ ਫ਼ਰਜ਼ੀ ਧਮਕੀਆਂ ਮਿਲ ਚੁੱਕੀਆਂ ਹਨ। ਪਿਛਲੇ ਹਫ਼ਤੇ ਹੀ ਅਹਿਮਦਾਬਾਦ ਤੋਂ ਇੱਕ ਬੰਗਲਾਦੇਸ਼ੀ ਮੂਲ ਦੇ ਮੁਲਜ਼ਮ ਸੌਰਭ ਵਿਸ਼ਵਾਸ ਨੂੰ ਗ੍ਰਿਫਤਾਰ ਕੀਤਾ ਗਿਆ ਸੀ, ਜਿਸ ਨੇ ਧਮਕੀ ਭਰੀਆਂ ਮੇਲਾਂ ਭੇਜਣ ਲਈ ਆਈ.ਡੀ. ਮੁਹੱਈਆ ਕਰਵਾਈਆਂ ਸਨ।