ਸਿੱਧੂ ਮੂਸੇਵਾਲਾ ਦੀ ਹੱਤਿਆ ਦੇ ਮਾਮਲੇ ‘ਚ ਪੁਲਿਸ ਦੀ ਜਾਂਚ ਦਾ ਸਾਹਮਣਾ ਕਰ ਰਹੇ ਗੈਂਗਸਟਰ ਲਾਰੈਂਸ ਬਿਸ਼ਨੋਈ ਨੇ ਪੁੱਛਗਿੱਛ ਦੌਰਾਨ ਖੁਲਾਸਾ ਕੀਤਾ ਹੈ ਕਿ ਉਹ 2018 ‘ਚ ਬਾਲੀਵੁੱਡ ਅਦਾਕਾਰ ਸਲਮਾਨ ਖ਼ਾਨ ਨੂੰ ਮਾਰਨਾ ਚਾਹੁੰਦਾ ਸੀ | ਦਿੱਲੀ ਪੁਲਿਸ ਦੇ ਵਿਸ਼ੇਸ਼ ਸੈੱਲ ਦੇ ਸੂਤਰਾਂ ਨੇ ਕਿਹਾ ਕਿ ਲਾਰੈਂਸ ਬਿਸ਼ਨੋਈ ਨੇ ਪੁਲਿਸ ਨੂੰ ਦੱਸਿਆ ਕਿ ਉਹ ਸਲਮਾਨ ਖ਼ਾਨ ਨੂੰ 1998 ‘ਚ ਕਾਲਾ ਹਿਰਨ ਦਾ ਸ਼ਿਕਾਰ ਕਰਨ ਦੇ ਬਦਲੇ ਵਜੋਂ ਮਾਰਨਾ ਚਾਹੁੰਦਾ ਸੀ | ਬਿਸ਼ਨੋਈ ਨੇ ਕਬੂਲ ਕੀਤਾ ਕਿ ਉਸ ਨੇ ਆਪਣੇ ਸਹਿਯੋਗੀ ਰਾਜਗੜ੍ਹ ਦੇ ਸੰਪਤ ਨੇਹਰਾ ਨੂੰ ਸਲਮਾਨ ਖ਼ਾਨ ਨੂੰ ਮਾਰਨ ਲਈ ਸੁਨੇਹਾ ਭੇਜਿਆ ਸੀ, ਜੋ ਉਸ ਸਮੇਂ ਭਗੌੜਾ ਸੀ | ਲਾਰੈਂਸ ਬਿਸ਼ਨੋਈ ਨੇ ਪੁਲਿਸ ਨੂੰ ਦੱਸਿਆ ਕਿ ਕਿ ਸੰਪਤ ਨੇਹਰਾ ਨੂੰ ਸਲਮਾਨ ਖ਼ਾਨ ਨੂੰ ਮਾਰਨ ਲਈ ਮੁੰਬਈ ਭੇਜਿਆ ਗਿਆ ਸੀ ਅਤੇ ਨੇਹਰਾ ਨੇ ਉਥੇ ਸਲਮਾਨ ਖ਼ਾਨ ਦੇ ਘਰ ਦੇ ਆਲੇ-ਦੁਆਲੇ ਦੀ ਰੇਕੀ ਵੀ ਕੀਤੀ ਸੀ | ਬਿਸ਼ਨੋਈ ਨੇ ਦੱਸਿਆ ਕਿ ਨੇਹਰਾ ਕੋਲ ਉਸ ਸਮੇਂ ਸਿਰਫ ਪਿਸਤੌਲ ਸੀ ਅਤੇ ਉਸ ਕੋਲ ਲੰਬੀ ਦੂਰੀ ਵਾਲਾ ਕੋਈ ਹਥਿਆਰ ਨਹੀਂ ਸੀ, ਜਿਸ ਕਰਕੇ ਉਹ ਸਲਮਾਨ ਖ਼ਾਨ ਦੇ ਘਰ ‘ਤੇ ਹਮਲਾ ਨਹੀਂ ਕਰ ਸਕਿਆ ਸੀ | ਇਸ ਤੋਂ ਬਾਅਦ ਲਾਰੈਂਸ ਬਿਸ਼ਨੋਈ ਨੇ ਦਿਨੇਸ਼ ਡਾਗਰ ਨਾਂਅ ਦੇ ਇਕ ਵਿਅਕਤੀ ਜ਼ਰੀਏ ਆਰ.ਕੇ. ਸਪਰਿੰਗ ਰਾਈਫ਼ਲ ਦਾ ਆਰਡਰ ਦਿੱਤਾ, ਜੋ 4 ਲੱਖ ਦੀ ਖ਼ਰੀਦੀ ਗਈ | ਇਸ ਲਈ ਡਾਗਰ ਦੇ ਇਕ ਸਹਿਯੋਗੀ ਅਨਿਲ ਪਾਂਡੇ ਨੂੰ ਪੈਸੇ ਦਿੱਤੇ ਗਏ | ਇਹ ਰਾਈਫ਼ਲ ਬਾਅਦ ‘ਚ 2018 ‘ਚ ਡਾਗਰ ਦੇ ਕਬਜ਼ੇ ‘ਚੋਂ ਬਰਾਮਦ ਕੀਤੀ ਗਈ ਸੀ | ਦੱਸਣਯੋਗ ਹੈ ਕਿ ਬੀਤੀ 6 ਜੁਲਾਈ ਨੂੰ ਹੀ ਕਾਲਾ ਹਿਰਨ ਹੱਤਿਆ ਮਾਮਲੇ ‘ਚ ਸਲਮਾਨ ਖ਼ਾਨ ਦੇ ਇਕ ਵਕੀਲ ਹਸਤੀ ਮਲ ਸਰਸਵਤ ਨੂੰ ਲਾਰੈਂਸ ਬਿਸ਼ਨੋਈ ਗੈਂਗ ਤੋਂ ਹੱਤਿਆ ਦੀ ਧਮਕੀ ਮਿਲੀ ਸੀ | ਸਰਸਵਤ ਨੇ ਪੁਲਿਸ ਕੋਲ ਦਰਜ ਕਰਵਾਈ ਸ਼ਿਕਾਇਤ ‘ਚ ਕਿਹਾ ਸੀ ਕਿ ਇਸ ਧਮਕੀ ਭਰੇ ਪੱਤਰ ‘ਤੇ ਲਾਰੈਂਸ ਬਿਸ਼ਨੋਈ ਅਤੇ ਉਸ ਦੇ ਸਾਥੀ ਗੋਲਡੀ ਬਰਾੜ ਦੇ ਨਾਂਅ ਸੀ | ਜਿਸ ‘ਚ ਲਿਖਿਆ ਗਿਆ ਸੀ ਕਿ ਅਸੀਂ ਤੇਰਾ ਵੀ ਸਿੱਧੂ ਮੂਸੇਵਾਲਾ ਵਰਗਾ ਹਾਲ ਕਰਾਂਗੇ, ਦੁਸ਼ਮਣ ਦਾ ਦੋਸਤ ਸਾਡਾ ਪਹਿਲਾ ਦੁਸ਼ਮਣ ਹੁੰਦਾ ਹੈ |
