ਪਟਿਆਲਾ, 1 ਜੁਲਾਈ, 2021: ਪੰਜਾਬ ਵਿਚ ਬਿਜਲੀ ਕੱਟਾਂ ਕਾਰਨ ਥਾਂ ਥਾਂ ‘ਤੇ ਕਿਸਾਨਾਂ ਤੇ ਆਮ ਲੋਕਾਂ ਨੇ ਧਰਨੇ ਲਾਉਣੇ ਸ਼ੁਰੂ ਕਰ ਦਿੱਤੇ ਹਨ । ਜਿੱਥੇ ਇੱਕ ਪਾਸੇ 10 ਜੂਨ ਤੋਂ ਸ਼ੁਰੂ ਹੋਏ ਝੋਨੇ ਦੇ ਸੀਜ਼ਨ ਲਈ ਵਾਅਦੇ ਅਨੁਸਾਰ 8 ਘੰਟੇ ਬਿਜਲੀ ਦੇਣ ਵਿਚ ਪੰਜਾਬ ਰਾਜ ਬਿਜਲੀ ਨਿਗਮ ਲਿਮਟਿਡ (ਪੀ ਐਸ ਪੀ ਸੀ ਐਲ) ਨਾਕਾਮ ਰਿਹਾ ਹੈ ਉੱਥੇ ਘਰੇਲੂ ਬਿਜਲੀ ਸਪਲਾਈ ਤੇ ਲੱਗੇ ਕੱਟ ਅਤੇ ਓਵਰਲੋਡ ਕਰਨ ਲਾਈਨਾਂ ਵਿਚ ਹੋਈ ਖ਼ਰਾਬੀ ਕਾਰਨ ਲੋਕ ਪ੍ਰੇਸ਼ਾਨ ਹੋ ਰਹੇ ਹਨ .
ਜਾਣਕਾਰੀ ਮੁਤਾਬਕ ਪੰਜਾਬ ਵਿਚ ਇਸ ਵੇਲੇ ਬਿਜਲੀ ਦੀ ਮੰਗ 14245 ਮੈਗਾਵਾਟ ਹੈ ਜਦਕਿ ਇਸਦੇ ਮੁਕਾਬਲੇ ਸਪਲਾਈ 12695 ਮੈਗਾਵਾਟ ਹੈ ਤੇ ਇਸ ਤਰੀਕੇ ਸੂਬੇ ਕੋਲ 1550 ਮੈਗਾਵਾਟ ਬਿਜਲੀ ਘੱਟ ਹੈ।
ਬਿਜਲੀ ਸਪਲਾਈ ਦੀ ਘਾਟ ਕਾਰਨ ਕੱਟਾਂ ਦਾ ਸਿਲਸਿਲਾ ਜਾਰੀ ਹੈ। ਜਿਥੇ ਪੀ ਐਸ ਪੀ ਸੀ ਐਲ ਨੇ ਮੰਗ ਤੇ ਸਪਲਾਈ ਵਿਚਕਾਰਲਾ ਖੱਪਾ ਪੂਰਨ ਲਈ 27 ਜੂਨ ਤੱਕ ਸਿਰਫ 6 ਲੱਖ ਯੂਨਿਟ ਬਿਜਲੀ ਦੀ ਘਾਟ ਕਾਰਨ ਕੱਟ ਲਗਾਏ ਸੀ, ਉਥੇ ਹੀ 28 ਜੂਨ ਨੁੰ 60 ਲੱਖ ਯੁਨਿਟ ਤੇ 29 ਜੂਨ ਨੁੰ 132 ਲੱਖ ਯੁਨਿਟ ਬਿਜਲੀ ਦੀ ਸਪਲਾਈ ਘੱਟ ਹੋਣ ਕਾਰਨ ਕੱਟ ਲਾਏ ਹਨ। ਇਸ ਰਿਪੋਰਟ ਮੁਤਾਬਕ 29 ਜੂਨ ਨੁੰ ਬਿਜਲੀ ਦੀ ਮੰਗ 3101 ਲੱਖ ਯੁਨਿਟ ਸੀ ਜਦਕਿ ਪੀ ਐਸ ਪੀ ਸੀ ਐਲ ਕੋਲ ਸਪਲਾਈ ਸਿਰਫ 2969 ਲੱਖ ਯੁਨਿਟ ਸੀ, ਜਿਸ ਕਾਰਨ 132 ਲੱਖ ਯੂਨਿਟ ਦੀ ਪੂਰਤੀ ਵਾਸਤੇ ਕੱਟ ਲਗਾਏ ਹਨ।
ਇਸ ਦੌਰਾਨ ਪੰਜਾਬ ਵਿਚ ਝੋਨੇ ਦੇ ਸੀਜ਼ਨ ਦੌਰਾਨ ਬਿਜਲੀ ਕੱਟਣ ਲੱਗਣ ਦਾ ਸੇਕ ਹੁਣ ਮੁੱਖ ਮੰਤਰੀ ਕੈਪਟਨ ਅਮਰਿੰਦਰ ਸਿੰਘ ਦੇ ਸ਼ਹਿਰ ਵੀ ਪਹੁੰਚ ਗਿਆ ਜਿਥੇ ਅੱਜ ਤਕਰੀਬਨ ਦੋ ਘੰਟੇ ਦਾ ਬਿਜਲੀ ਕੱਟ ਲਾਇਆ ਗਿਆ।
ਇਸ ਦੇ ਕੀ ਕਾਰਨ ਰਹੇ ? ਕੀ ਪੀ ਐਸ ਪੀ ਸੀ ਐਲ ਇਸ ਚੋਣ ਵਰ੍ਹੇ ਵਿਚ ਝੋਨੇ ਦੇ ਸੀਜ਼ਨ ਲਈ ਬਿਜਲੀ ਸਪਲਾਈ ਦੀ ਯੋਜਨਾਬੰਦੀ ਚ ਨਾਕਾਮ ਰਿਹਾ ਜਾਂ ਸਾਧਨਾਂ ਅਤੇ ਸਟਾਫ਼ ਦੀ ਘਾਟ ਹੈ ਜਾਂ ਕੋਈ ਹੋਰ ਪਰ ਨਤੀਜਾ ਲੋਕਾਂ ਨੂੰ ਪ੍ਰੇਸ਼ਾਨੀ ਅਤੇ ਕੈਪਟਨ ਸਰਕਾਰ ਦੀ ਬਦਨਾਮੀ ‘ਚਾਹੀਦਾ ਨਿਕਲ ਰਿਹਾ ਹੈ .
