ਈਰਾਨ ਨੇ ਇਜ਼ਰਾਈਲ ਦੇ ਹਾਈਫਾ ਸ਼ਹਿਰ ‘ਤੇ ਮਿਜ਼ਾਈਲ ਹਮਲਾ ਕੀਤਾ ਹੈ। ਇਸ ਹਮਲੇ ਵਿੱਚ ਇਜ਼ਰਾਈਲ ਨੂੰ ਕਾਫੀ ਨੁਕਸਾਨ ਪਹੁੰਚਿਆ ਹੈ। ਹਾਈਫਾ ਸ਼ਹਿਰ ‘ਤੇ ਹੋਏ ਇਸ ਹਮਲੇ ਵਿੱਚ ਦੋ ਲੋਕਾਂ ਦੀ ਮੌਤ ਹੋ ਗਈ ਹੈ, ਜਦਕਿ ਦੋ ਲੋਕ ਲਾਪਤਾ ਦੱਸੇ ਜਾ ਰਹੇ ਹਨ। ਈਰਾਨ ਦੇ ਇਨ੍ਹਾਂ ਨਵੇਂ ਹਮਲਿਆਂ ਤੋਂ ਬਾਅਦ ਪੂਰੇ ਮੱਧ ਇਜ਼ਰਾਈਲ ਵਿੱਚ ਸਾਇਰਨ ਗੂੰਜ ਰਹੇ ਹਨ।
ਦਰਅਸਲ, ਐਤਵਾਰ ਨੂੰ ਈਰਾਨ ਨੇ ਇਜ਼ਰਾਈਲ ਵਿੱਚ ਚਾਰ ਮਿਜ਼ਾਈਲਾਂ ਦਾਗੀਆਂ ਸਨ। ਇਨ੍ਹਾਂ ਵਿੱਚੋਂ ਇੱਕ ਭਾਰੀ ਮਿਜ਼ਾਈਲ ਹਾਈਫਾ ਸ਼ਹਿਰ ਵਿੱਚ ਸਥਿਤ ਇੱਕ ਅਪਾਰਟਮੈਂਟ ਬਲਾਕ ‘ਤੇ ਜਾ ਡਿੱਗੀ, ਜਿਸ ਕਾਰਨ ਇਮਾਰਤ ਦਾ ਅੱਧਾ ਹਿੱਸਾ ਢਹਿ ਗਿਆ। ਇਮਾਰਤ ਦਾ ਬਾਕੀ ਬਚਿਆ ਹਿੱਸਾ ਵੀ ਅਸੰਤੁਲਿਤ ਹੋ ਗਿਆ ਹੈ, ਜਿਸ ਕਾਰਨ ਉਸ ਦੇ ਡਿੱਗਣ ਦਾ ਖ਼ਤਰਾ ਵਧ ਗਿਆ ਹੈ ਅਤੇ ਬਚਾਅ ਕਾਰਜ ਹੋਰ ਵੀ ਮੁਸ਼ਕਲ ਹੋ ਗਏ ਹਨ।
ਦੋ ਲਾਸ਼ਾਂ ਬਰਾਮਦ, ਦੋ ਲੋਕ ਲਾਪਤਾ
ਰਾਹਤ ਅਤੇ ਬਚਾਅ ਟੀਮਾਂ ਨੇ ਪੂਰੀ ਰਾਤ ਕੰਮ ਕੀਤਾ। ਸੋਮਵਾਰ ਸਵੇਰ ਤੱਕ ਚੱਲੀ ਮੁਹਿੰਮ ਦੌਰਾਨ ਮਲਬੇ ਵਿੱਚੋਂ ਦੋ ਲੋਕਾਂ ਦੀਆਂ ਲਾਸ਼ਾਂ ਬਰਾਮਦ ਕੀਤੀਆਂ ਗਈਆਂ ਹਨ, ਜਦਕਿ ਦੋ ਹੋਰ ਅਜੇ ਵੀ ਲਾਪਤਾ ਹਨ। ਇਜ਼ਰਾਈਲੀ ਫੌਜ ਨੇ ਈਰਾਨ ਵੱਲੋਂ ਦਾਗੀਆਂ ਗਈਆਂ ਕੁਝ ਹੋਰ ਮਿਜ਼ਾਈਲਾਂ ਦਾ ਪਤਾ ਲਗਾਇਆ ਹੈ, ਜਿਸ ਤੋਂ ਬਾਅਦ ਮੱਧ ਇਜ਼ਰਾਈਲ ਵਿੱਚ ਹਵਾਈ ਹਮਲੇ ਦੇ ਸਾਇਰਨ ਜ਼ੋਰ-ਜ਼ੋਰ ਨਾਲ ਵੱਜ ਰਹੇ ਹਨ।
ਹਾਈਫਾ ‘ਤੇ ਕਿਉਂ ਹੁੰਦੇ ਰਹਿੰਦੇ ਹਨ ਹਮਲੇ
ਦੱਸਣਯੋਗ ਹੈ ਕਿ ਹਾਈਫਾ ਉੱਤਰੀ ਇਜ਼ਰਾਈਲ ਦਾ ਤੀਜਾ ਸਭ ਤੋਂ ਵੱਡਾ ਸ਼ਹਿਰ ਹੈ, ਜੋ ਭੂਮੱਧ ਸਾਗਰ ਦੇ ਤੱਟ ਅਤੇ ਮਾਊਂਟ ਕਾਰਮਲ ਦੀਆਂ ਢਲਾਣਾਂ ‘ਤੇ ਸਥਿਤ ਹੈ। ਆਪਣੇ ਰਣਨੀਤਕ ਮਹੱਤਵ ਕਾਰਨ ਹਾਈਫਾ ਅਕਸਰ ਈਰਾਨੀ ਮਿਜ਼ਾਈਲਾਂ ਦੇ ਨਿਸ਼ਾਨੇ ‘ਤੇ ਰਹਿੰਦਾ ਹੈ। ਇਸ ਤੋਂ ਇਲਾਵਾ ਹਾਈਫਾ ਗੁਆਂਢੀ ਦੇਸ਼ ਲੇਬਨਾਨ ਦੀ ਸਰਹੱਦ ਤੋਂ ਦਾਗੇ ਜਾਣ ਵਾਲੇ ਹਿਜ਼ਬੁੱਲਾ ਦੇ ਰਾਕੇਟਾਂ ਦੀ ਰੇਂਜ ਦੇ ਅੰਦਰ ਵੀ ਆਉਂਦਾ ਹੈ।
ਹਾਈਫਾ ਵਿੱਚ ਅਪਾਰਟਮੈਂਟ ‘ਤੇ ਮਿਜ਼ਾਈਲ ਡਿੱਗਣ ਤੋਂ ਬਾਅਦ ਜਦੋਂ ਬਚਾਅ ਕਾਰਜ ਚੱਲ ਰਿਹਾ ਸੀ ਤਾਂ ਈਰਾਨ ਵੱਲੋਂ ਇੱਕ ਹੋਰ ਮਿਜ਼ਾਈਲ ਆਉਣ ਦੇ ਖ਼ਦਸ਼ੇ ਕਾਰਨ ਫਿਰ ਤੋਂ ਅਲਰਟ ਜਾਰੀ ਕੀਤਾ ਗਿਆ। ਹਾਲਾਂਕਿ ਬਾਅਦ ਵਿੱਚ ਇਸ ਅਲਰਟ ਨੂੰ ਹਟਾ ਲਿਆ ਗਿਆ।
ਮੱਧ ਇਜ਼ਰਾਈਲ ‘ਚ ਅਲਰਟ
ਇਸ ਦੇ ਨਾਲ ਹੀ ਸੋਮਵਾਰ ਸਵੇਰੇ ਈਰਾਨ ਵੱਲੋਂ ਤਿੰਨ ਹੋਰ ਮਿਜ਼ਾਈਲਾਂ ਆਉਂਦੀਆਂ ਦੇਖੀਆਂ ਗਈਆਂ, ਜਿਸ ਤੋਂ ਬਾਅਦ ਮੱਧ ਇਜ਼ਰਾਈਲ ਵਿੱਚ ਅਲਰਟ ਜਾਰੀ ਕਰ ਦਿੱਤਾ ਗਿਆ ਸੀ। ਇਜ਼ਰਾਈਲ ਨੇ ਇਨ੍ਹਾਂ ਵਿੱਚੋਂ ਜ਼ਿਆਦਾਤਰ ਮਿਜ਼ਾਈਲਾਂ ਨੂੰ ਰਸਤੇ ਵਿੱਚ ਹੀ ਨਸ਼ਟ ਕਰ ਦਿੱਤਾ, ਜਦਕਿ ਬਾਕੀ ਮਿਜ਼ਾਈਲਾਂ ਖਾਲੀ ਮੈਦਾਨਾਂ ਵਿੱਚ ਜਾ ਡਿੱਗੀਆਂ।
