ਭੌਤਿਕ ਵਿਗਿਆਨ ਲਈ ਜਾਪਾਨ, ਜਰਮਨੀ ਤੇ ਇਟਲੀ ਦੇ ਵਿਗਿਆਨੀਆਂ ਨੂੰ ਨੋਬਲ ਪੁਰਸਕਾਰ |

ਭੌਤਿਕ ਵਿਗਿਆਨ ਲਈ 2021 ਦਾ ਨੋਬਲ ਪੁਰਸਕਾਰ ਇਸ ਵਾਰ ਤਿੰਨ ਵਿਗਿਆਨੀਆਂ ਨੂੰ ਦਿੱਤਾ ਜਾਵੇਗਾ, ਜਿਨ੍ਹਾਂ ‘ਚ ਜਾਪਾਨ ਦੇ ਸੁਕੋਰੋ ਮਨਾਬੇ (90), ਜਰਮਨੀ ਦੇ ਕਲਾਸ ਹੇਸਲਮਨ (89) ਅਤੇ ਇਟਲੀ ਦੇ ਜਿਓਰਜੀਓ ਪਾਰਿਸੀ (73) ਦੇ ਨਾਂਅ ਸ਼ਾਮਿਲ ਹਨ | ਇਸ ਵਾਰ ਤਿੰਨਾਂ ਵਿਗਿਆਨੀਆਂ ‘ਚ ਇਹ ਪੁਰਸਕਾਰ ਵੰਡਿਆ ਜਾਵੇਗਾ | ਅੱਧਾ ਪੁਰਸਕਾਰ ਸੁਕੋਰੋ ਮਨਾਬੇ ਅਤੇ ਕਲਾਸ ਹੇਸਲਮਨ ‘ਚ ਵੰਡਿਆ ਜਾਵੇਗਾ, ਜਿੰਨ੍ਹਾਂ ਨੇ ਧਰਤੀ ਦੀ ਜਲਵਾਯੂ ਦਾ ਭੌਤਿਕ ਮਾਡਲ ਤਿਆਰ ਕੀਤਾ, ਜਿਸ ਨਾਲ ਇਸ ‘ਚ ਹੋਣ ਵਾਲੇ ਬਦਲਾਅ ‘ਤੇ ਸਟੀਕਤਾ ਨਾਲ ਨਜ਼ਰ ਰੱਖੀ ਜਾ ਸਕਦੀ ਹੈ ਅਤੇ ਆਲਮੀ ਤਪਸ਼ ਦਾ ਅੰਦਾਜ਼ਾ ਲਗਾਇਆ ਜਾ ਸਕਦਾ ਹੈ | ਜਦੋਂਕਿ ਅੱਧਾ ਪੁਰਸਕਾਰ ਜਿਓਰਜੀਓ ਪਾਰਿਸੀ ਦੇ ਨਾਂਅ ਕੀਤਾ ਜਾਵੇਗਾ, ਜਿਨ੍ਹਾਂ ਨੇ ਅਣੂਆਂ ਤੋਂ ਲੈ ਕੇ ਗ੍ਰਹਿਆਂ ਤੱਕ ਦੀ ਭੌਤਿਕ ਪ੍ਰਣਾਲੀ ‘ਚ ਹੋਣ ਵਾਲੇ ਤੇਜ਼ ਬਦਲਾਅ ਅਤੇ ਵਿਕਾਰਾਂ ਦਰਮਿਆਨ ਦੀ ਗਤੀਵਿਧੀ ਨੂੰ ਦਿਖਾਇਆ |