ਪਾਕਿਸਤਾਨ ਦੀ ਖ਼ੁਫ਼ੀਆ ਏਜੰਸੀ ਆਈਐੱਸਆਈ ਤੇ ਇੰਟਰਨੈਸ਼ਨਲ ਸਿੱਖ ਯੂਥ ਫੇਡਰੇਸ਼ਨ (ਆਈਐੱਸਵਾਈਐੱਫ) ਦੇ ਇਸ਼ਾਰੇ ’ਤੇ ਭਾਰਤ ’ਚ ਅੱਤਵਾਦੀ ਘਟਨਾਵਾਂ ਨੂੰ ਅੰਜਾਮ ਦੇਣ ਦੀ ਫ਼ਿਰਾਕ ’ਚ ਘੁੰਮ ਰਹੇ ਚਾਰ ਅੱਤਵਾਦੀਆਂ ਨੂੰ ਪੰਜਾਬ ਪੁਲਿਸ ਨੇ ਗ੍ਰਿਫ਼ਤਾਰ ਕੀਤਾ ਹੈ।
ਜਾਂਚ ਵਿਚ ਸਾਹਮਣੇ ਆਇਆ ਹੈ ਕਿ ਮੁਲਜ਼ਮਾਂ ਨੇ ਪਾਕਿਸਤਾਨ ’ਚ ਬੈਠੇ ਆਈਐੱਸਵਾਈਐੱਫ ਦੇ ਮੁਖੀ ਲਖਬੀਰ ਸਿੰਘ ਰੋਡੇ ਤੇ ਆਈਐੱਸਆਈ ਦੇ ਏਜੰਟ ਕਾਸਿਮ ਦੇ ਇਸ਼ਾਰੇ ’ਤੇ 8 ਅਗਸਤ ਨੂੰ ਅਜਨਾਲਾ ਦੇ ਸ਼ਰਮਾ ਫਿਲੰਗ ਸਟੇਸ਼ਨ ’ਤੇ ਖੜ੍ਹੇ ਪੈਟਰੋਲ ਦੇ ਟੈਂਕਰ ਨੂੰ ਟਿਫਨ ਬੰਬ ਨਾਲ ਉਡਾ ਦਿੱਤਾ ਸੀ।
ਓਧਰ ਐੱਸਐੱਸਪੀ ਗੁਲਨੀਤ ਸਿੰਘ ਖੁਰਾਣਾ ਨੇ ਦੱਸਿਆ ਕਿ ਚਾਰਾਂ ਅੱਤਵਾਦੀਆਂ ਤੋਂ ਪੁੱਛਗਿੱਛ ਕੀਤੀ ਜਾ ਰਹੀ ਹੈ। ਸ਼ੱਕ ਹੈ ਕਿ ਮੁਲਜਮਾਂ ਨੇ ਪੰਜਾਬ ’ਚ ਕਈ ਥਾਵਾਂ ’ਤੇ ਵਿਸਫੋਟਕ ਲੁਕਾ ਕੇ ਰੱਖੇ ਹਨ। ਡੀਜੀਪੀ ਦਫ਼ਤਰ ਵੱਲੋਂ ਬੁੱਧਵਾਰ ਰਾਤ ਜਾਰੀ ਪ੍ਰੈੱਸ ਨੋਟ ਵਿਚ ਫੜੇ ਗਏ ਮੁਲਜ਼ਮਾਂ ਦੀ ਪਛਾਣ ਭਾਰਤ-ਪਾਕਿ ਸਰਹੱਦ ਨਾਲ ਲੱਗਦੇ ਪਿੰਡ ਭਕਨਾ ਤਾਰਾ ਸਿੰਘ ਵਾਸੀ ਰੂਬਲ ਸਿੰਘ, ਬੱਲੜਵਾਲ ਪਿੰਡ ਵਾਸੀ ਵਿੱਕੀ ਭੁੱਟੀ, ਉਗਰ ਔਲਖ ਪਿੰਡ ਵਾਸੀ ਮਲਕੀਤ ਸਿੰਘ ਤੇ ਗੁਰਪ੍ਰੀਤ ਸਿੰਘ ਉਰਫ਼ ਗੋਪੀ ਦੱਸੀ ਹੈ। ਰੂਬਲ ਸਿੰਘ ਨੂੰ ਅੰਬਾਲੇ ਤੋਂ ਗਿ੍ਰਫ਼ਤਾਰ ਕੀਤਾ ਗਿਆ ਹੈ ਜਦਕਿ ਬਾਕੀਆਂ ਨੂੰ ਉਨ੍ਹਾਂ ਦੇ ਪਿੰਡਾਂ ਤੋਂ ਗਿ੍ਰਫ਼ਤਾਰ ਕੀਤਾ ਗਿਆ ਹੈ। ਜਾਂਚ ’ਚ ਸਾਹਮਣੇ ਆਇਆ ਹੈ ਕਿ ਪਾਕਿਸਤਾਨ ’ਚ ਬੈਠਾ ਆਈਐੱਸਵਾਈਐੱਫ ਦਾ ਮੁਖੀ ਲਖਬੀਰ ਸਿੰਘ ਰੋਡੇ ਆਪਣੇ ਸਾਥੀ ਆਈਐੱਸਆਈ ਦੇ ਏਜੰਟ ਕਾਸਿਮ ਨਾਲ ਮਿਲ ਕੇ ਫੜੇ ਗਏ ਚਾਰਾਂ ਅੱਤਵਾਦੀਆਂ ਰਾਹੀਂ ਪੰਜਾਬ ’ਚ ਅੱਤਵਾਦੀ ਵਾਰਦਾਤਾਂ ਨੂੰ ਅੰਜਾਮ ਦੇਣ ਦੀ ਫ਼ਿਰਾਕ ’ਚ ਸੀ। ਵਿੱਕੀ ਭੁੱਟੀ ਮੋਬਾਈਲ ਜ਼ਰੀਏ ਸਿੱਧੀ ਲਖਬੀਰ ਸਿੰਘ ਰੋਡੇ ਤੇ ਕਾਸਿਮ ਨਾਲ ਗੱਲ ਕਰ ਰਿਹਾ ਸੀ। ਐੱਸਐੱਸਪੀ ਖੁਰਾਣਾ ਨੇ ਦੱਸਿਆ ਕਿ ਪਤਾ ਲਾਇਆ ਜਾ ਰਿਹਾ ਹੈ ਕਿ ਮੁਲਜ਼ਮਾਂ ਦੇ ਕਿੰਨੇ ਸਾਥੀ ਸਰਹੱਦੀ ਇਲਾਕੇ ਤੋਂ ਇਲਾਵਾ ਪੰਜਾਬ ’ਚ ਕਿੱਥੇ-ਕਿੱਥੇ ਸਰਗਮ ਹੋ ਰਹੇ ਹਨ। ਜ਼ਿਕਰਯੋਗ ਹੈ ਕਿ ਬੀਤੇ ਡੇਢ ਮਹੀਨੇ ’ਚ ਪਾਕਿਸਤਾਨੀ ਡ੍ਰੋਨਾਂ ਰਾਹੀਂ ਭੇਜੇ ਗਏ ਟਿਫਨ ਬੰਬ, ਦਸਤੀ ਬੰਬ ਅਤੇ ਹੈਰੋਇਨ ਪੰਜਾਬ ਪੁਲਿਸ ਬਰਾਮਦ ਕਰ ਚੁੱਕੀ ਹੈ।
ਸਕੂਲ-ਕਾਲਜ ਹਨ ਨਿਸ਼ਾਨੇ ’ਤੇ
ਮੁਲਜ਼ਮਾਂ ਨੇ ਪੁੱਛਗਿੱਛ ’ਚ ਸਵੀਕਾਰ ਕੀਤਾ ਹੈ ਕਿ ਆਈਐੱਸਆਈਤੋਂ ਉਨ੍ਹਾਂ ਨੂੰ ਟੀਚਾ ਮਿਲਿਆ ਸੀ ਕਿ ਜ਼ਿਆਦਾ ਤੋਂ ਜ਼ਿਆਦਾ ਸਕੂਲਾਂ ਤੇ ਕਾਲਜਾਂ ਨੂੰ ਉਡਾਇਆ ਜਾਵੇ। ਇਹ ਪਤਾ ਲੱਗਦਿਆਂ ਹੀ ਪੁਲਿਸ ਨੇ ਪੰਜਾਬ ਦੇ ਸਕੂਲਾਂ ਤੇ ਕਾਲਜਾਂ ਦੀ ਸੁਰੱਖਿਆ ਵਧਾ ਦਿੱਤੀ ਹੈ। ਆਈਐੱਸਆਈ ਨੇ ਵਿੱਕੀ ਨੂੰ ਟੀਚਾ ਦਿੱਤਾ ਸੀ ਕਿ ਬੰਬ ਧਮਾਕਿਆਂ ’ਚ ਜ਼ਿਆਦਾ ਤੋਂ ਜ਼ਿਆਦਾ ਲੋਕਾਂ ਦੀ ਮੌਤ ਹੋਵੇ ਅਤੇ ਜ਼ਿਆਦਾ ਤੋਂ ਜ਼ਿਆਦਾ ਲੋਕ ਜ਼ਖ਼ਮੀ ਹੋਣ। ਇਸ ਕੰਮ ਲਈ ਉਸ ਨੂੰ ਦੋ ਲੱਖ ਰੁਪਏ ਦਿੱਤੇ ਜਾਣੇ ਸਨ। ਪੈਟਰੋਲ ਦੇ ਟੈਂਕਰ ਨੂੰ ਟਿਫਨ ਬੰਬ ਨਾਲ ਉਡਾਣਾਂ ਦੇ ਮਾਮਲੇ ਵਿਚ ਹਾਲੇ ਉਸ ਨੂੰ ਦੋ ਲੱਖ ਰੁਪਏ ਦਾ ਭੁਗਤਾਨ ਕੀਤਾ ਜਾਣਾ ਬਾਕੀ ਸੀ।
