ਭਗਵੰਤ ਮਾਨ ਜੀ ! ਕੀ ਇਹ ਵੀ ਬਦਲਾਅ ਦਾ ਹਿੱਸਾ ਹੈ ? ਦਿੱਲੀ ਦਾ ਕਪੂਰਥਲਾ ਹਾਊਸ ਪੰਜਾਬ ਦੇ ਮੁੱਖ ਮੰਤਰੀ ਦਾ ਆਫੀਸੀਅਲ ਰੈਜੀਡੈਂਸ ਹੈ। ਜਿੱਥੇ ਕੇਵਲ ਮੁੱਖ ਮੰਤਰੀ ਹੀ ਨਿਵਾਸ ਕਰ ਸਕਦੇ ਹਨ ਅਤੇ ਨਿਯਮਾਂ ਅਨੁਸਾਰ ਕਿਸੇ ਹੋਰ ਦੇ ਠਹਿਰਨ ਲਈ ਵੀ ਕਪੂਰਥਲਾ ਹਾਊਸ ‘ਚ ਬੁਕਿੰਗ ਤੱਕ ਨਹੀਂ ਹੋ ਸਕਦੀ। ਪਰ ਏਥੇ ਤਾਂ ਰਾਘਵ ਚੱਢਾ ਜੀ ਦੀ ਮੰਗਣੀ ਦੇ ਪ੍ਰਾਈਵੇਟ ਸਮਾਗਮ ਤੱਕ ਕਰ ਦਿੱਤੇ ਗਏ ਹਨ। ਕੀ ਹੁਣ ਇਹ ਪੱਕਾ ਮੰਨ ਲਿਆ ਜਾਵੇ (ਜੋ ਆਮ ਹੀ ਚਰਚਾ ਹੈ) ਕਿ ਸ਼੍ਰੀ ਰਾਘਵ ਚੱਢਾ ਪੰਜਾਬ ਦੇ ਸੁਪਰ ਮੁੱਖ ਮੰਤਰੀ ਹਨ ?
ਇਹ ਕਹਿਣਾ ਹੈ ਸ਼੍ਰੋਮਣੀ ਅਕਾਲੀ ਦਲ ਦੇ ਸੀਨੀਅਰ ਆਗੂ ਵਿਰਸਾ ਸਿੰਘ ਵਲਟੋਹਾ ਦਾ ਜਿੰਨਾ ਨੇ ਹਾਲ ਹੀ ਵਿਚ ‘ਆਪ’ ਦੇ ਰਾਜ ਸਭਾ ਮੈਂਬਰ ਰਾਘਵ ਚੱਡਾ ਅਤੇ ਬਾਲੀਵੁੱਡ ਕਲਾਕਾਰ ਪ੍ਰਣੀਤੀ ਚੌਪੜਾ ਦੇ ਹੋਏ ਮੰਗਣੀ ਸਮਾਗਮ ‘ਤੇ ਕੁਝ ਸਵਾਲ ਖੜੇ ਕੀਤੇ ਹਨ। ਇਸਦੇ ਨਾਲ ਹੀ ਉਹਨਾਂ ਸਵਾਲ ਕਰਦਿਆਂ ਪੁੱਛਿਆ ਕਿ 70 ਸਾਲਾਂ ਅੰਦਰ ਕਪੂਰਥਲਾ ਹਾਊਸ ਦੀ ਕਦੇ ਪ੍ਰਾਈਵੇਟ ਬੁਕਿੰਗ ਨਹੀਂ ਹੋਈ। ਫਿਰ ਨਿਯਮਾਂ ਦੀ ਉਲੰਘਣਾ ਕਰਕੇ ਇਹ ਬੁਕਿੰਗ ਕਿਉਂ ਕੀਤੀ ਗਈ ? ਕੀ ਨਿਯਮਾਂ ਦੀ ਉਲੰਘਣਾ ਕਰਨ ਵਾਲਿਆਂ ‘ਤੇ ਬਣਦੀ ਕਾਰਵਾਈ ਹੋਵੇਗੀ ? ਜੇਕਰ ਬੁਕਿੰਗ ਵੀ ਨਹੀਂ ਹੋਈ ਤੇ ਓਥੇ ਪ੍ਰਾਈਵੇਟ ਸਮਾਗਮ ਤੱਕ ਕਰ ਦਿੱਤਾ ਗਿਆ, ਕੀ ਇਸ ਸੰਬੰਧੀ ਸਮਾਗਮ ਕਰਨ ਵਾਲਿਆਂ ‘ਤੇ ਐਕਸ਼ਨ ਲਵੋਗੇ ?
ਇਸ ਤੋਂ ਇਲਾਵਾ ਉਹਨਾਂ ਕਿਹਾ ਕਿ ਮੈਨੂੰ ਇਹ ਵੀ ਖਤਰਾ ਹੈ ਕਿ ਪੰਜਾਬ ਵਿਧਾਨ ਸਭਾ ਵਿੱਚ ਆਮ ਆਦਮੀ ਪਾਰਟੀ ਨਾਲ ਸੰਬੰਧਤ ਕਈ ਮੰਤਰੀ ਅਤੇ MLA ਅਜੇ ਵੀ ਕੁਆਰੇ ਹਨ ਅਤੇ ਆਉਣ ਵਾਲੇ ਸਮੇਂ ‘ਚ ਪੰਜਾਬ ਦੀ ਇਹ ਇਤਿਹਾਸਕ ਵਿਰਾਸਤ ਕਪੂਰਥਲਾ ਹਾਊਸ ਕਿਤੇ ਮੈਰਿਜ ਪੈਲੇਸ ਹੀ ਨਾ ਬਣਾ ਦਿੱਤਾ ਜਾਵੇ।
ਦੱਸ ਦਈਏ ਕਿ ਬੀਤੇ ਦਿਨੀਂ ਬਾਲੀਵੁੱਡ ਅਦਾਕਾਰਾ ਪ੍ਰਣੀਤੀ ਚੋਪੜਾ ਤੇ ਮੈਂਬਰ ਰਾਜ ਸਭਾ ਰਾਘਵ ਚੱਢਾ ਦੀ ਮੰਗਣੀ ਹੋਈ ਹੈ । ਕਪੂਰਥਲਾ ਹਾਊਸ ‘ਚ ਹੋਏ ਸਮਾਗਮ ‘ਚ ਬਾਲੀਵੁੱਡ ਸਣੇ ਕਈ ਰਾਜਨੀਤਕ ਆਗੂਆਂ, ਅਰਵਿੰਦਰ ਕੇਜਰੀਵਾਲ ਤੇ ਭਗਵੰਤ ਮਾਨ ਨੇ ਵੀ ਸ਼ਿਰਕਤ ਕੀਤੀ ਸੀ। ਇਸ ਤੋਂ ਪਹਿਲਾਂ ਅਕਾਲੀ ਆਗੂ ਵਲਟੋਹਾ ਨੇ ਰਾਘਵ ਚੱਢਾ ਅਤੇ ਪ੍ਰਣੀਤੀ ਚੋਪੜਾ ਦੇ ਮੰਗਣੀ ਸਮਾਗਮ ‘ਚ ਜਥੇਦਾਰ ਹਰਪ੍ਰੀਤ ਸਿੰਘ ਦੇ ਸ਼ਾਮਲ ਹੋਣ ‘ਤੇ ਵੀ ਸਵਾਲ ਚੁੱਕੇ ਸਨ।
