ਬੈਂਕਾਂ ਦੇ ਨਿੱਜੀਕਰਨ ਖ਼ਿਲਾਫ਼ ਦੇਸ਼ ਭਰ ਦੇ 11 ਲੱਖ ਮੁਲਾਜ਼ਮਾਂ ਵਲੋਂ ਦੋ ਦਿਨ ਹੜਤਾਲ ਕੀਤੀ ਗਈ | ਬੈਂਕ ਮੁਲਾਜ਼ਮਾਂ ਵਲੋਂ ਮੁਕੰਮਲ ਬੰਦ ਰੱਖਣ ਕਰਕੇ ਦੇਸ਼ ਭਰ ਅੰਦਰ ਅਰਬਾਂ ਰੁਪਏ ਦਾ ਲੈਣ-ਦੇਣ ਰੁਕ ਗਿਆ | ਦੇਸ਼ ਅੰਦਰ ਵੱਖ-ਵੱਖ ਬੈਂਕਾਂ ਦੀਆਂ 1.18 ਲੱਖ ਸ਼ਾਖਾਵਾਂ ਹਨ, ਜਿੰਨ੍ਹਾਂ ‘ਚ 9 ਲੱਖ ਮੁਲਾਜ਼ਮ ਕੰਮ ਕਰਦੇ ਹਨ | ਇਹ ਦੋ ਦਿਨਾਂ ਹੜਤਾਲ ਯੂਨਾਈਟਿਡ ਫੋਰਮ ਆਫ਼ ਬੈਂਕ ਯੂਨੀਅਨਜ਼(ਯੂ.ਐਫ.ਬੀ.ਯੂ.) ਦੇ ਸੱਦੇ ‘ਤੇ ਕੀਤੀ ਗਈ ਹੈ | ਦੇਸ਼ ਭਰ ਦੇ ਬੈਂਕ ਦੋ ਦਿਨ ਬੰਦ ਰਹਿਣਗੇ | ਦੇਸ਼ ਅੰਦਰ ਕੌਮੀ ਬੈਂਕਾਂ ਦੇ 9.34 ਲੱਖ ਅਤੇ ਖੇਤੀਬਾੜੀ ਬੈਂਕਾਂ ਦੇ 1.66 ਲੱਖ ਮੁਲਾਜ਼ਮ ਹਨ | ਬੈਂਕ ਮੁਲਾਜ਼ਮਾਂ ਵਲੋਂ ਕੇਂਦਰ ਸਰਕਾਰ ਵਲੋਂ ਬੈਂਕਾਂ ਦਾ ਨਿੱਜੀਕਰਨ ਕਰਨ ਖ਼ਿਲਾਫ਼ ਰੋਸ ਪ੍ਰਗਟਾਉਣ ਲਈ ਦੋ ਦਿਨਾਂ ਦੀ ਹੜਤਾਲ ਕੀਤੀ ਗਈ ਹੈ | 16 ਤੇ 17 ਦਸੰਬਰ ਨੂੰ ਬੈਂਕਾਂ ਦੀ ਹੜਤਾਲ ਹੈ | 18 ਦਸੰਬਰ ਨੂੰ ਸ਼ਿਲਾਂਗ ਵਿਚ ਬੈਂਕਾਂ ਵਿਚ ਕੰਮਕਾਜ ਠੱਪ ਰਹੇਗਾ, ਕਿਉਂਕਿ ਇਸ ਦਿਨ ਯੂ ਸੋਸੋ ਧਾਮ ਦਾ ਸਾਲਾਨਾ ਦਿਹਾੜਾ ਹੈ | 19 ਦਸੰਬਰ ਨੂੰ ਐਤਵਾਰ ਹੋਣ ਕਰਕੇ ਹੁਣ ਬੈਂਕਾਂ ਦਾ ਕੰਮ 20 ਦਸੰਬਰ ਨੂੰ ਚਾਲੂ ਹੋਵੇਗਾ | ਸਰਦ ਰੁੱਤ ਸੈਸ਼ਨ ਵਿਚ ਬੈਂਕਿੰਗ ਕਾਨੂੰਨ ਸੋਧ ਬਿੱਲ 2021 ਨੂੰ ਪੇਸ਼ ਕਰਨ ਦੀ ਸਰਕਾਰ ਦੀ ਯੋਜਨਾ ਦੇ ਵਿਰੋਧ ਵਿਚ ਅੱਜ ਦੇਸ਼ ਵਿਆਪੀ ਅੰਦੋਲਨ ਸ਼ੁਰੂ ਕੀਤਾ ਗਿਆ ਹੈ | ਸਰਕਾਰ ਵਲੋਂ 2 ਸਰਕਾਰੀ ਬੈਂਕਾਂ ਦੇ ਨਿੱਜੀਕਰਨ ਦੀ ਯੋਜਨਾ ਬਣਾ ਰਹੀ ਹੈ | ਹੜਤਾਲ ਦੌਰਾਨ ਬੈਂਕ ਮੁਲਾਜ਼ਮਾਂ ਦੇ ਆਗੂਆਂ ਵਲੋਂ ਇਹ ਦੋਸ਼ ਲਗਾਇਆ ਗਿਆ ਹੈ ਕਿ ਲੋਕਾਂ ਦੀ ਕਮਾਈ ਦੇ ਜੋ 1.57 ਲੱਖ ਕਰੋੜ ਰੁਪਏ ਕੌਮੀ ਜਨਤਕ ਬੈਂਕਾਂ ਵਿਚ ਜਮ੍ਹਾਂ ਹਨ, ਉਨ੍ਹਾਂ ‘ਤੇ ਕਰਪੋਰੇਟ ਘਰਾਣਿਆਂ ਦੀ ਨਜ਼ਰ ਹੈ | ਜੇਕਰ ਬੈਂਕਾਂ ਦਾ ਨਿੱਜੀਕਰਨ ਹੁੰਦਾ ਹੈ ਤਾਂ ਕਾਰਪੋਰੇਟ ਘਰਾਣੇ ਆਪਣੀ ਮਨਮਰਜ਼ੀ ਨਾਲ ਕਰਜ਼ ਲੈ ਸਕਣਗੇ |
