ਮੋਹਾਲੀ ਨਾਲ ਲੱਗਦੇ ਜ਼ੀਰਕਪੁਰ ਅਤੇ ਆਲ਼ੇ-ਦੁਆਲੇ ਦੇ ਖੇਤਰਾਂ ਵਿੱਚ ਨਵਜੋਤ ਸਿੰਘ ਸਿੱਧੂ ਦੇ ਪੋਸਟਰਾਂ ‘ਤੇ ਕਾਲਖ ਮਲੇ ਜਾਣ ਦੀ ਘਟਨਾ ਸਾਹਮਣੇ ਆਈ ਹੈ। ਜ਼ੀਰਕਪੁਰ ਏਅਰਪੋਰਟ ਰੋਡ ਦੇ ਲਾਈਟਾਂ ਅਤੇ ਇਸ ਦੇ ਆਲ਼ੇ-ਦੁਆਲੇ ਲੱਗੇ ਪੋਸਟਰਾਂ ‘ਤੇ ਲੱਗੇ ਪੋਸਟਰਾਂ ‘ਤੇ ਕਿਸੇ ਸ਼ਰਾਰਤੀ ਤੱਤਾਂ ਵੱਲੋਂ ਰਾਤ ਦੇ ਸਮੇਂ ਇਹ ਕੰਮ ਕੀਤਾ ਗਿਆ ਹੈ।
ਇਹ ਸਾਰੀ ਘਟਨਾ ਮੰਗਲਵਾਰ ਦੀ ਰਾਤ ਦੀ ਹੈ ਅਤੇ ਇਸ ਘਟਨਾ ਦਾ ਪਤਾ ਬੁੱਧਵਾਰ ਦੇ ਸਵੇਰ ਨੂੰ ਲੱਗਿਆ। ਹੁਣ ਤੱਕ ਅਜਿਹਾ ਕਰਨ ਵਾਲੇ ਦੀ ਸ਼ਨਾਖਤ ਨਹੀਂ ਹੋਈ ਹੈ। ਇਹ ਘਟਨਾ ਪੁਲਿਸ ਪ੍ਰਸ਼ਾਸਨ ਦੇ ਕੰਮ ‘ਤੇ ਵੀ ਸਵਾਲ ਚੁੱਕਦੀ ਹੈ ਕਿਉਂਕਿ ਜਿਸ ਥਾਂ ਦੀ ਇਹ ਘਟਨਾ ਹੈ ਉੱਥੇ 24 ਘੰਟੇ ਪੁਲਿਸ ਹੁੰਦੀ ਹੈ ਅਤੇ ਬਕਾਇਦਾ ਇੱਕ ਪੁਲਿਸ ਪੋਸਟ ਵੀ ਹੈ।
ਇਸ ਘਟਨਾ ‘ਤੇ ਪੁਲਿਸ ਪ੍ਰਸ਼ਾਸਨ ਵੱਲੋਂ ਜਲਦ ਤੋਂ ਜਲਦ ਮੁਲਜ਼ਮ ਨੂੰ ਫੜਨ ਦੀ ਗੱਲ ਕਹੀ ਗਈ ਹੈ। ਜ਼ੀਰਕਪੁਰ ਦੇ ਐਮ. ਸੀ ਉਦੈਵੀਰ ਢਿੱਲੋਂ ਇਸ ਮਾਮਲੇ ਨੂੰ ਵਿਰੋਧੀ ਧਿਰਾਂ ਦੀ ਕਾਰਵਾਈ ਆਖਦੇ ਹਨ। ਪੋਸਟਰਾਂ ਨੂੰ ਬਦਲ ਦਿੱਤਾ ਗਿਆ ਹੈ ਅਤੇ ਨਵੇਂ ਪੋਸਟਰ ਲਾ ਦਿੱਤੇ ਗਏ ਹਨ।
ਆਲ ਇੰਡੀਆ ਕਾਂਗਰਸ ਕੋਆਰਡੀਨੇਟਰ ਨਿਰਮੈਲ ਸਿੰਘ ਨਾਲ ਇਸ ਮਾਮਲੇ ‘ਤੇ ਸਵਾਲ ਕਰਨ ‘ਤੇ ਉਨ੍ਹਾਂ ਨੇ ਕਿਹਾ, “ਅਸੀਂ ਚੰਗੇ ਘਰਾਂ ਦੇ ਬੰਦੇ ਹਾਂ! ਜਿਸਨੇ ਇਹ ਕੰਮ ਕਰਨਾ ਸੀ ਉਹ ਕਰ ਗਿਆ, ਅਸੀਂ ਵੀ ਆਪਣਾ ਕੰਮ ਕਰਤਾ। ਅਸੀਂ ਪੋਸਟਰ ਬਦਲ ਦਿੱਤੇ। ਪਰ ਜਿਸਨੇ ਇਹ ਕੰਮ ਕੀਤਾ ਉਸਨੂੰ ਇਹ ਸੋਭਾ ਨਹੀਂ ਦਿੰਦਾ।”
ਜ਼ਿਕਰਯੋਗ ਹੈ ਕਿ ਅਜਿਹਾ ਹੀ ਮਾਮਲਾ 2019 ਵਿੱਚ ਨਵਜੋਤ ਸਿੰਘ ਸਿੱਧੂ ਵੱਲੋਂ ਪੁਲਵਾਮਾ ਹਮਲੇ ‘ਤੇ ਦਿੱਤੇ ਗਏ ਬਿਆਨ ਤੋਂ ਹੋਇਆ ਸੀ। ਉਦੋਂ ਭਾਜਪਾ ਵੱਲੋਂ ਨਵਜੋਤ ਸਿੰਘ ਸਿੱਧੂ ਦੇ ਪੋਸਟਰਾਂ ‘ਤੇ ਕਾਲਖ ਮਲ ਦਿੱਤਾ ਗਿਆ ਸੀ। ਅਜਿਹਾ ਪਹਿਲੀ ਜਾਂ ਦੂਜੀ ਵਾਰ ਨਹੀਂ ਹੈ ਜਦੋਂ ਅਜਿਹਾ ਮਾਮਲਾ ਸਾਹਮਣੇ ਆਇਆ ਹੈ। ਦੇਸ਼ ਦੇ ਵੱਖ ਵੱਖ ਰਾਜਾਂ ਦੇ ਵਿੱਚ ਅਜਿਹਾ ਹੁੰਦਾ ਰਹਿੰਦਾ ਹੈ।
