ਅਮਰੀਕੀ ਰਾਸ਼ਟਰਪਤੀ ਜੋ ਬਾਈਡਨ ਨੇ ਐਲਾਨ ਕੀਤਾ ਕਿ ਅਮਰੀਕਾ ਰੂਸੀ ਬੈਂਕਾਂ ਅਤੇ ਅਮੀਰਾਂ ‘ਤੇ ਭਾਰੀ ਵਿੱਤੀ ਪਾਬੰਦੀਆਂ ਲਾਉਣ ਦਾ ਆਦੇਸ਼ ਦੇ ਰਿਹਾ ਹੈ | ਉਨ੍ਹਾਂ ਕਿਹਾ ਕਿ ਮਾਸਕੋ ਦਾ ਯੂਕਰੇਨ ‘ਚ ਚੁੱਕਿਆ ਗਿਆ ਕਦਮ ਅੰਤਰਰਾਸ਼ਟਰੀ ਕਾਨੂੰਨਾਂ ਦੀ ਉਲੰਘਣਾ ਕੀਤੀ ਹੈ | ਉਨ੍ਹਾਂ ਕਿਹਾ ਕਿ ਯੂਕਰੇਨ ਬਾਰੇ ਰੂਸੀ ਰਾਸ਼ਟਰਪਤੀ ਵਲਾਦੀਮੀਰ ਪੁਤਿਨ ਦੇ ਦਾਅਵਿਆਂ ਨਾਲ ਸਾਡੇ ‘ਚੋਂ ਕੋਈ ਵੀ ਮੂਰਖ ਨਹੀਂ ਬਣੇਗਾ | ਉਨ੍ਹਾਂ ਕਿਹਾ ਕਿ ਜੇਕਰ ਪੁਤਿਨ ਹੋਰ ਅੱਗੇ ਵਧੇ ਤਾਂ ਹੋਰ ਪਾਬੰਦੀਆਂ ਲਾਈਆਂ ਜਾ ਸਕਦੀਆਂ ਹਨ | ਉਨ੍ਹਾਂ ਕਿਹਾ ਕਿ ਉਹ ਰੂਸ ਦੀ ਸਰਹੱਦ ਨਾਲ ਲੱਗੇ ਨਾਟੋ ਦੇ ਪੂਰਬੀ ਹਿੱਸੇ ‘ਤੇ ਬਾਲਟਿਕ ਰਾਜਾਂ ‘ਚ ਹੋਰ ਅਮਰੀਕੀ ਸੈਨਾ ਭੇਜ ਰਹੇ ਹਨ | ਅਮਰੀਕੀ ਰਾਸ਼ਟਰਪਤੀ ਨੇ ਯੂਕਰੇਨ ਦੀਆਂ ਘਟਨਾਵਾਂ ਨੂੰ ਯੂਕਰੇਨ ‘ਤੇ ਰੂਸ ਦੇ ਹਮਲੇ ਦੀ ਸ਼ੁਰੂਆਤ ਦੱਸਦੇ ਹੋਏ ਕਿਹਾ ਕਿ ਰੂਸ ਅੰਤਰਰਾਸ਼ਟਰੀ ਕਾਨੂੰਨਾਂ ਦੀ ਉਲੰਘਣਾ ਕਰ ਰਿਹਾ ਹੈ | ਉਨ੍ਹਾਂ ਕਿਹਾ ਕਿ ਨਾਟੋ ਦੇਸ਼ਾਂ ਨਾਲ ਅਸੀਂ ਬੈਠਕ ਕੀਤੀ ਹੈ ਤੇ ਅਸੀਂ ਚਾਹੁੰਦੇ ਹਾਂ ਕਿ ਸਥਿਰਤਾ ਆਏ | ਉਨ੍ਹਾਂ ਕਿਹਾ ਕਿ ਰੂਸ ਨੂੰ ਦੁਨੀਆ ਭਰ ਤੋਂ ਮਿਲ ਰਹੀ ਵਿੱਤੀ ਸਹਾਇਤਾ ਨੂੰ ਰੋਕਣ ਦੀ ਕੋਸ਼ਿਸ਼ ਕੀਤੀ ਜਾਵੇਗੀ | ਉਨ੍ਹਾਂ ਕਿਹਾ ਕਿ ਰੂਸ ਨਾਲ ਲੜਾਈ ਦਾ ਉਨ੍ਹਾਂ ਦਾ ਕੋਈ ਇਰਾਦਾ ਨਹੀਂ ਪਰ ਨਾਲ ਹੀ ਉਨ੍ਹਾਂ ਨਾਟੋ ਦੇ ਇਲਾਕੇ ਦੇ ਇਕ-ਇਕ ਇੰਚ ਦੀ ਰੱਖਿਆ ਦੀ ਵਚਨਬੱਧਤਾ ਪ੍ਰਗਟਾਈ | ਉਨ੍ਹਾਂ ਕਿਹਾ ਕਿ ਪਾਬੰਦੀਆਂ ਦੇ ਪਹਿਲੇ ਹਿੱਸੇ ਦੇ ਰੂਪ ‘ਚ ਦੋ ਸਭ ਤੋਂ ਵੱਡੇ ਬੈਂਕਾਂ ਵੀ. ਆਈ. ਬੀ. ਅਤੇ ਰੂਸੀ ਮਿਲਟਰੀ ਬੈਂਕ ਨਾਲ ਜੁੜੇ ਲੈਣ ਦੇਣ ਲਈ ਕਦਮ ਚੁੱਕੇ ਜਾਣਗੇ | ਨਾਲ ਹੀ ਉਨ੍ਹਾਂ ਨੇ ਰੂਸੀ ਅਰਥਵਿਵਥਾ ਨੂੰ ਅੰਤਰਰਾਸ਼ਟਰੀ ਵਿੱਤੀ ਵਿਵਸਥਾਵਾਂ ਤੋਂ ਮਿਲ ਰਹੇ ਕੁਝ ਹਿੱਸੇ ‘ਚ ਵੀ ਕਟੌਤੀ ਦਾ ਐਲਾਨ ਕੀਤਾ | ਇਸੇ ਦੌਰਾਨ ਉਨ੍ਹਾਂ ਕਿਹਾ ਕਿ ਰੂਸ ਯੂਕਰੇਨ ਨਾਲ ਲਗਦੀ ਆਪਣੀ ਸਰਹੱਦ ‘ਤੇ ਖ਼ੂਨ ਦਾ ਸਟਾਕ ਜਮ੍ਹਾਂ ਕਰ ਰਿਹਾ ਹੈ, ਜੇਕਰ ਯੁੱਧ ਦੀ ਮਨਸ਼ਾ ਨਹੀਂ ਹੈ ਤਾਂ ਖ਼ੂਨ ਦਾ ਜ਼ਰੂਰਤ ਨਹੀਂ ਹੋਣੀ ਚਾਹੀਦੀ |
