‘ਜੋ ਹੁਣ ਤੱਕ ਨਹੀਂ ਬਦਲਿਆ, ਉਹ ਹੁਣ ਬਦਲੇਗਾ’; ਕੇਰਲ ’ਚ ਚੋਣ ਰੈਲੀ ਦੌਰਾਨ ਬੋਲੇ ਪੀਐਮ ਮੋਦੀ

ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਅੱਜ ਕੇਰਲ ਦੌਰੇ ‘ਤੇ ਹਨ। ਪੀਐਮ ਮੋਦੀ ਨੇ ਕੇਰਲ ਦੇ ਪਲੱਕੜ ਵਿੱਚ ਇੱਕ ਵਿਸ਼ਾਲ ਰੈਲੀ ਨੂੰ ਸੰਬੋਧਨ ਕੀਤਾ। ਰੈਲੀ ਨੂੰ ਸੰਬੋਧਨ ਕਰਦਿਆਂ ਪੀਐਮ ਮੋਦੀ ਨੇ ਕਿਹਾ, “ਮੈਨੂੰ ਕੇਰਲ ਵਿੱਚ ਇੱਕ ਨਵੀਂ ਅਤੇ ਵੱਖਰੀ ਊਰਜਾ ਮਹਿਸੂਸ ਹੋ ਰਹੀ ਹੈ।”

ਪੀਐਮ ਮੋਦੀ ਨੇ ਅੱਗੇ ਕਿਹਾ ਕਿ ਕੇਰਲਮ ਤਬਦੀਲੀ ਦਾ ਸੰਦੇਸ਼ ਦੇ ਰਿਹਾ ਹੈ। ਐਨਡੀਏ ਦੀ ਵਧਦੀ ਲੋਕਪ੍ਰਿਯਤਾ, ਭਾਜਪਾ ਪ੍ਰਤੀ ਲੋਕਾਂ ਦਾ ਵਧਦਾ ਵਿਸ਼ਵਾਸ, ਅੱਜ ਤੁਹਾਡਾ ਸਾਰਿਆਂ ਦਾ ਇਹ ਉਤਸ਼ਾਹ ਅਤੇ ਸਮਰਥਨ, ਇੰਨੀ ਵੱਡੀ ਗਿਣਤੀ ਵਿੱਚ ਤੁਹਾਡੀ ਮੌਜੂਦਗੀ… ਇਹ ਦੱਸ ਰਹੀ ਹੈ ਕਿ ਕੇਰਲਮ ਦਾ ਮੂਡ ਹੁਣ ਇੱਕ ਵੱਡੀ ਲਹਿਰ ਬਣ ਚੁੱਕਾ ਹੈ।

ਹੁਣ ਕੇਰਲਮ ਦੇ ਨੌਜਵਾਨਾਂ ਦਾ ਵਿਸ਼ਵਾਸ ਹੈ— ਭਾਜਪਾ ਅਤੇ ਐਨਡੀਏ।

ਕੇਰਲਮ ਦੀਆਂ ਮਹਿਲਾਵਾਂ ਦਾ ਸਨੇਹ ਹੈ— ਭਾਜਪਾ ਅਤੇ ਐਨਡੀਏ।

ਹੁਣ ਕੇਰਲਮ ਦੇ ਕਿਸਾਨਾਂ ਦਾ ਪ੍ਰੇਮ ਹੈ— ਭਾਜਪਾ ਅਤੇ ਐਨਡੀਏ।

ਇਨ੍ਹਾਂ ਨੂੰ ਕੇਰਲਮ ਦੇ ਵਿਕਾਸ ਦੀ ਕੋਈ ਪਰਵਾਹ ਨਹੀਂ

ਪੀਐਮ ਮੋਦੀ ਨੇ ਕਿਹਾ, “ਕੇਰਲਮ ਦਹਾਕਿਆਂ ਤੋਂ ਸੁਆਰਥੀ ਰਾਜਨੀਤੀ ਦੇ ਦੋ ਮੁਖੌਟਿਆਂ ਵਿਚਕਾਰ ਫਸਿਆ ਹੋਇਆ ਹੈ। ਇੱਕ ਪਾਸੇ LDF ਹੈ ਤਾਂ ਦੂਜੇ ਪਾਸੇ UDF, ਇੱਕ ਪਾਸੇ ਕਮਿਊਨਿਸਟ ਹਨ ਤਾਂ ਦੂਜੇ ਪਾਸੇ ਕਾਂਗਰਸ। ਇੱਕ ਭ੍ਰਿਸ਼ਟ ਹੈ ਤਾਂ ਦੂਜੀ ਮਹਾਂ-ਭ੍ਰਿਸ਼ਟ, ਇੱਕ ਫ਼ਿਰਕੂ ਹੈ ਤਾਂ ਦੂਜੀ ਮਹਾਂ-ਫ਼ਿਰਕੂ। LDF ਅਤੇ UDF ਦੀਆਂ ਸਾਰੀਆਂ ਨੀਤੀਆਂ ਸਿਰਫ਼ ਵੋਟ ਬੈਂਕ ਦੀ ਰਾਜਨੀਤੀ ਲਈ ਹੀ ਹੁੰਦੀਆਂ ਹਨ। ਇਨ੍ਹਾਂ ਨੂੰ ਕੇਰਲਮ ਦੇ ਵਿਕਾਸ ਦੀ ਕੋਈ ਪਰਵਾਹ ਨਹੀਂ ਹੈ।”

“ਹੁਣ ਮੈਂ ਤੁਹਾਨੂੰ ਭਰੋਸਾ ਦਿੰਦਾ ਹਾਂ ਕਿ ਇੱਥੇ ਬਣਨ ਵਾਲੀ ਭਾਜਪਾ-ਐਨਡੀਏ ਸਰਕਾਰ ਕੇਰਲਮ ਦਾ ਤੇਜ਼ੀ ਨਾਲ ਵਿਕਾਸ ਕਰੇਗੀ, ਵਿਕਸਿਤ ਕੇਰਲਮ ਬਣਾਏਗੀ… ਇਹ ਮੋਦੀ ਦੀ ਗਾਰੰਟੀ ਹੈ।”

UDF ਅਤੇ LDF ਬਣਾ ਰਹੇ ਹਨ ਭਾਜਪਾ ਨੂੰ ਨਿਸ਼ਾਨਾ

ਪੀਐਮ ਮੋਦੀ ਨੇ ਕਿਹਾ, “UDF ਅਤੇ LDF, ਦੋਵੇਂ ਹੀ BJP ਨੂੰ ਨਿਸ਼ਾਨਾ ਬਣਾ ਰਹੇ ਹਨ, ਕਿਉਂਕਿ ਉਨ੍ਹਾਂ ਨੂੰ ਡਰ ਹੈ ਕਿ ਇਹ ਪਾਰਟੀ ਉਨ੍ਹਾਂ ਦੇ ਪਿਛਲੇ ਕੁਕਰਮਾਂ ਦਾ ਪਰਦਾਫਾਸ਼ ਕਰ ਦੇਵੇਗੀ। ਦਹਾਕਿਆਂ ਤੋਂ, LDF ਅਤੇ UDF ਵੱਡੇ-ਵੱਡੇ ਘੁਟਾਲਿਆਂ ਵਿੱਚ ਸ਼ਾਮਲ ਰਹੇ ਹਨ, ਫਿਰ ਵੀ ਉਨ੍ਹਾਂ ਨੇ ਕਦੇ ਇੱਕ-ਦੂਜੇ ਦੇ ਖ਼ਿਲਾਫ਼ ਕੋਈ ਠੋਸ ਕਾਰਵਾਈ ਨਹੀਂ ਕੀਤੀ।”

“ਇਸ ਦੀ ਬਜਾਏ, ਉਨ੍ਹਾਂ ਨੇ ਸਿਰਫ਼ ਖੋਖਲੇ ਬਿਆਨ ਜਾਰੀ ਕਰਨ ਦਾ ਰਸਤਾ ਚੁਣਿਆ। ਜੇਕਰ BJP ਸੱਤਾ ਵਿੱਚ ਆਉਂਦੀ ਹੈ, ਤਾਂ LDF ਅਤੇ UDF ਦੁਆਰਾ ਕੀਤੇ ਗਏ ਸਾਰੇ ਘੁਟਾਲਿਆਂ ਦੀ ਡੂੰਘਾਈ ਨਾਲ ਜਾਂਚ ਕੀਤੀ ਜਾਵੇਗੀ, ਅਤੇ ਇਨਸਾਫ਼ ਯਕੀਨੀ ਬਣਾਇਆ ਜਾਵੇਗਾ। ਇਸੇ ਖ਼ਦਸ਼ੇ ਨੇ ਇਨ੍ਹਾਂ ਦੋਵਾਂ ਪਾਰਟੀਆਂ ਦੀਆਂ ਰਾਤਾਂ ਦੀ ਨੀਂਦ ਉਡਾ ਦਿੱਤੀ ਹੈ।”

ਪੀਐਮ ਮੋਦੀ ਨੇ ਕਿਹਾ, “ਅੱਜਕੱਲ੍ਹ, ਕਮਿਊਨਿਸਟ ਅਤੇ ਕਾਂਗਰਸ ਦੋਵਾਂ ਨੇ ਹੀ ਨਵੇਂ ਪ੍ਰਚਾਰ ਮੁਹਿੰਮਾਂ ਸ਼ੁਰੂ ਕੀਤੀਆਂ ਹਨ। ਕਮਿਊਨਿਸਟਾਂ ਦਾ ਦਾਅਵਾ ਹੈ ਕਿ ਕਾਂਗਰਸ, BJP ਦੀ “B ਟੀਮ” ਹੈ; ਉੱਥੇ ਹੀ ਕਾਂਗਰਸ, ਕਮਿਊਨਿਸਟਾਂ ‘ਤੇ BJP ਦੀ “B ਟੀਮ” ਹੋਣ ਦਾ ਦੋਸ਼ ਲਗਾਉਂਦੀ ਹੈ। ਇਸ ਆਪਸੀ ਦੋਸ਼-ਪ੍ਰਤੀਦੋਸ਼ ਤੋਂ ਇਹ ਸੰਕੇਤ ਮਿਲਦਾ ਹੈ ਕਿ UDF ਅਤੇ LDF—ਦੋਵਾਂ ਨੇ ਹੀ ਅਸਿੱਧੇ ਤੌਰ ‘ਤੇ ਇਹ ਸਵੀਕਾਰ ਕਰ ਲਿਆ ਹੈ ਕਿ ਕੇਰਲਮ ਵਿੱਚ BJP ਹੀ ਇਕਲੌਤੀ ਇੱਕਜੁੱਟ ਟੀਮ ਹੈ।

ਕੇਰਲਮ ਵਿੱਚ BJP-NDA ਸਰਕਾਰ ਤੇਜ਼ੀ ਨਾਲ ਵਿਕਾਸ ਕਰੇਗੀ। ਅਸੀਂ ‘ਵਿਕਸਿਤ ਕੇਰਲਮ’ ਬਣਾਵਾਂਗੇ, ਅਤੇ ਇਹ ਮੋਦੀ ਦੀ ਗਾਰੰਟੀ ਹੈ। ਜੋ ਹੁਣ ਤੱਕ ਨਹੀਂ ਬਦਲਿਆ, ਉਹ ਹੁਣ ਬਦਲੇਗਾ। ਹੁਣ ਕੇਰਲ ਦਾ ਵਿਕਾਸ ਹੋਵੇਗਾ।”