ਆਟਾ, ਪਨੀਰ ਤੇ ਦਹੀਂ ਅੱਜ ਤੋਂ ਮਹਿੰਗੇ |

ਗਾਹਕਾਂ ਨੂੰ ਸੋਮਵਾਰ ਤੋਂ ਕੁਝ ਚੀਜ਼ਾਂ ਖ਼ਰੀਦਣ ਲਈ ਵੱਧ ਪੈਸੇ ਦੇਣੇ ਹੋਣਗੇ, ਇਨ੍ਹਾਂ ਵਸਤੂਆਂ ‘ਚ ਪਹਿਲਾਂ ਤੋਂ ਪੈਕ ਕੀਤੀਆਂ ਤੇ ਲੇਬਲ ਲੱਗੀਆਂ ਖਾਣ-ਪੀਣ ਵਾਲੀਆਂ ਵਸਤੂਆਂ ਸ਼ਾਮਿਲ ਹਨ, ਜਿਨ੍ਹਾਂ ‘ਚ ਆਟਾ, ਪਨੀਰ ਤੇ ਦਹੀਂ ਆਦਿ ਹਨ | ਹੁਣ ਇਨ੍ਹਾਂ ‘ਤੇ 5 ਫ਼ੀਸਦੀ ਜੀ. ਐਸ. ਟੀ. ਦੇਣਾ ਪਵੇਗਾ | ਇਸ ਤੋਂ ਇਲਾਵਾ 5000 ਰੁਪਏ ਤੋਂ ਵੱਧ ਕਿਰਾਏ ਵਾਲੇ ਹਸਪਤਾਲ ਦੇ ਕਮਰਿਆਂ ‘ਤੇ ਵੀ 5 ਫ਼ੀਸਦੀ ਜੀ.ਐਸ.ਟੀ. ਦਾ ਭੁਗਤਾਨ ਕਰਨਾ ਪਵੇਗਾ | ਬੀਤੇ ਦਿਨੀਂ ਜੀ.ਐਸ.ਟੀ. ਕੌਂਸਲ ਦੀ ਮੀਟਿੰਗ ‘ਚ ਕੀਤੇ ਗਏ ਇਹ ਫ਼ੈਸਲੇ ਸੋਮਵਾਰ ਤੋਂ ਲਾਗੂ ਹੋਣਗੇ | ਇਸ ਤੋਂ ਇਲਾਵਾ 1000 ਰੁਪਏ ਪ੍ਰਤੀ ਦਿਨ ਤੱਕ ਦੇ ਕਿਰਾਏ ਵਾਲੇ ਹੋਟਲ ਦੇ ਕਮਰੇ, ਐਟਲਸਾਂ ਸਮੇਤ ਨਕਸ਼ਿਆਂ ਤੇ ਚਾਰਟਾਂ ਆਦਿ ‘ਤੇ 12 ਫ਼ੀਸਦੀ ਜੀ.ਐਸ.ਟੀ. ਲੱਗੇਗਾ | ਟੈਟ੍ਰਾ ਪੈਕ ‘ਤੇ ਵੀ 18 ਫ਼ੀਸਦੀ ਜੀ.ਐਸ.ਟੀ. ਲੱਗੇਗਾ | ਇਸ ਤੋਂ ਇਲਾਵਾ ਜੇ ਬੈਂਕ ਹੁਣ ਲੂਜ਼ ਜਾਂ ਕਿਤਾਬ ਦੇ ਰੂਪ ‘ਚ ਚੈੱਕ ਜਾਰੀ ਕਰਨਗੇ, ਤਾਂ ਇਸ ‘ਤੇ ਵੀ ਟੈਕਸ ਲੱਗੇਗਾ | ਪਿ੍ਟਿੰਗ, ਲਿਖਤੀ ਜਾਂ ਡਰਾਇੰਗ ਸਿਆਹੀ, ਕੱਟਣ ਵਾਲੇ ਬਲੇਡ, ਕਾਗਜ਼ ਦੇ ਚਾਕੂ ਅਤੇ ਪੈਨਸਿਲ ਸ਼ਾਪਨਰ, ਐਲ.ਈ.ਡੀ. ਲੈਂਪ, ਡਰਾਇੰਗ ਤੇ ਮਾਰਕਿੰਗ ਵਾਲੇ ਉਪਕਰਨਾਂ ‘ਤੇ ਵੀ ਟੈਕਸ 12 ਫ਼ੀਸਦੀ ਤੋਂ ਵੱਧ ਕੇ 18 ਫ਼ੀਸਦੀ ਹੋ ਜਾਵੇਗਾ | ਨਾਲ ਹੀ ਸੂਰਜੀ ਵਾਟਰ ਹੀਟਰ ‘ਤੇ ਹੁਣ 12 ਫ਼ੀਸਦੀ ਜੀ.ਐਸ.ਟੀ. ਲੱਗੇਗੀ, ਜੋ ਪਹਿਲਾਂ 5 ਫ਼ੀਸਦੀ ਸੀ | ਸੜਕਾਂ, ਪੁਲਾਂ, ਰੇਲਵੇ, ਮੈਟਰੋ, ਗੰਦੇ ਪਾਣੀ ਲਈ ਟਰੀਟਮੈਂਟ ਪਲਾਂਟ ਅਤੇ ਅੰਤਿਮ ਸੰਸਕਾਰ ਲਈ ਜਾਰੀ ਹੋਣ ਵਾਲੇ ਕੰਮ ਦੇ ਠੇਕਿਆਂ ‘ਤੇ ਵੀ ਹੁਣ 18 ਫ਼ੀਸਦੀ ਜੀ.ਐਸ.ਟੀ. ਲੱਗੇਗਾ, ਜੋ ਪਹਿਲਾਂ 12 ਫ਼ੀਸਦੀ ਸੀ | ਭਾਰਤੀ ਰਿਜ਼ਰਵ ਬੈਂਕ (ਆਰ.ਬੀ.ਆਈ.), ਆਈ. ਆਰ. ਡੀ. ਏ. ਤੇ ਸੇਬੀ ਵਰਗੇ ਰੈਗੂਲੇਟਰਾਂ ਦੀਆਂ ਸੇਵਾਵਾਂ ਵੀ ਮਹਿੰਗਆਂ ਹੋ ਰਹੀਆਂ ਹਨ | ਹੁਣ ਇਹ ਏਜੰਸੀਆਂ ਆਪਣੀ ਸਰਵਿਸ ‘ਤੇ 18 ਫ਼ੀਸਦੀ ਟੈਕਸ ਲਗਾਉਣਗੀਆਂ | ਜੇਕਰ ਆਪਣੇ ਰਹਿਣ ਵਾਲੇ ਘਰ ਜਾਂ ਫਲੈਟ ਨੂੰ ਕਿਰਾਏ ‘ਤੇ ਚੜ੍ਹਾਉਂਦੀਆਂ ਹਨ ਤਾਂ ਉਹ ਬਿਜ਼ਨਸ ਸ਼੍ਰੇਣੀ ‘ਚ ਆਏਗਾ ਅਤੇ ਉਸ ‘ਤੇ 18 ਫ਼ੀਸਦੀ ਟੈਕਸ ਲੱਗੇਗਾ | ਬਾਇਓ-ਮੈਡੀਕਲ ਵੇਸਟ ਟ੍ਰੀਟਮੈਂਟ ਦੀ ਸੁਵਿਧਾ ਦੇਣ ਵਾਲਿਆਂ ‘ਤੇ 12 ਫ਼ੀਸਦੀ ਟੈਕਸ ਲੱਗੇਗਾ | ਰੋਜ਼ਾਨਾ 5000 ਰੁਪਏ ਵਾਲੇ ਹਸਪਤਾਲ ਦੇ ਕਮਰੇ, ਜੋ ਆਈ.ਸੀ.ਯੂ. ਦੀ ਸ਼੍ਰੇਣੀ ‘ਚ ਨਹੀਂ ਆਉਂਦੇ, ਉਨ੍ਹਾਂ ਕਮਰਿਆਂ ‘ਤੇ 5 ਫ਼ੀਸਦੀ ਜੀ.ਐਸ.ਟੀ. ਲੱਗੇਗਾ | ਇਸ ‘ਚ ਇਨਪੁਟ ਟੈਕਸ ਕ੍ਰੇਡਿਟ ਦਾ ਫਾਇਦਾ ਨਹੀਂ ਮਿਲੇਗਾ | ਕੋਈ ਵੀ ਇਲੈਕਟਿ੍ਕ ਵਾਹਨ, ਜਿਸ ‘ਚ ਬੈਟਰੀ ਪੈਕ ਲੱਗਾ ਹੈ ਜਾਂ ਨਹੀਂ, ਉਸ ‘ਤੇ 5 ਫ਼ੀਸਦੀ ਜੀ.ਐਸ.ਟੀ. ਲੱਗੇਗਾ |