ਅਸੰਸਦੀ ਸ਼ਬਦਾਂ ਦੀ ਸੂਚੀ ਨੂੰ ਲੈ ਕੇ ਵਿਰੋਧੀ ਧਿਰਾਂ ਵਲੋਂ ਤਿੱਖਾ ਪ੍ਰਤੀਕਰਮ |

-ਅਸੰਸਦੀ ਸ਼ਬਦਾਂ ਨੂੰ ਲੈ ਕੇ ਛਿੜੀ ਸ਼ਬਦੀ ਜੰਗ ਦਰਮਿਆਨ ਲੋਕ ਸਭਾ ਸਪੀਕਰ ਓਮ ਬਿਰਲਾ ਨੇ ਵਿਰੋਧੀ ਧਿਰਾਂ ਦੇ ਦੋਸ਼ਾਂ ਨੂੰ ਖ਼ਾਰਜ ਕਰਦਿਆਂ ਕਿਹਾ ਕਿ ਦੋਵੇਂ ਸਦਨਾਂ ‘ਚ ਕਿਤੇ ਵੀ ਕਿਸੇ ਸ਼ਬਦ ‘ਤੇ ਪਾਬੰਦੀ ਨਹੀਂ ਲਗਾਈ ਗਈ | ਉਨ੍ਹਾਂ ਕਿਹਾ ਕਿ ਸਕੱਤਰੇਤ ਵਲੋਂ ਜਾਰੀ ਕੀਤੀ ਗਈ ਸੂਚੀ ਸਿਰਫ਼ ਉਨ੍ਹਾਂ ਸ਼ਬਦਾਂ ਦੀ ਹੈ, ਜਿਨ੍ਹਾਂ ਨੂੰ ਅਤੀਤ ‘ਚ ਰਿਕਾਰਡ ਤੋਂ ਹਟਾਇਆ ਗਿਆ ਹੈ | ਲੋਕ ਸਭਾ ਸਕੱਤਰੇਤ ਵਲੋਂ ਬੁੱਧਵਾਰ ਨੂੰ ਜਾਰੀ ਕੀਤੇ ਅਸੰਸਦੀ ਸ਼ਬਦਾਂ ‘ਚ ਜੁਮਲਾਜੀਵੀ, ਬਾਲ ਬੁੱਧੀ, ਕੋਵਿਡ ‘ਸਪਰੈਡਰ’, ਸਨੂਪਗੇਟ ਆਦਿ ਸ਼ਬਦਾਂ ਤੋਂ ਇਲਾਵਾ ਗੁਲ ਖਿਲਾਏ, ਪਿੱਠੂ, ਸ਼ੁਕਨੀ, ਜੈਚੰਦ, ਲਾਲੀਪਾਪ ਆਦਿ ਸ਼ਬਦ ਵੀ ਸ਼ਾਮਿਲ ਹਨ | ਸਕੱਤਰੇਤ ਵਲੋਂ ਜਾਰੀ ਸੂਚੀ ‘ਚ ਆਮ ਬੋਲਚਾਲ ਦੀ ਭਾਸ਼ਾ ‘ਚ ਵਰਤੇ ਜਾਣ ਵਾਲੇ ਸ਼ਬਦ ਧੋਖਾ, ਡਰਾਮਾ, ਅਸਮਰੱਥ ਆਦਿ ਸ਼ਬਦ ਵੀ ਸ਼ਾਮਿਲ ਹਨ | ਇਸ ਸੂਚੀ ਦੇ ਜਾਰੀ ਹੋਣ ਤੋਂ ਬਾਅਦ ਹੀ ਵਿਰੋਧੀ ਧਿਰਾਂ ਵਲੋਂ ਤਿੱਖੇ ਸ਼ਬਦੀ ਹਮਲੇ ਕੀਤੇ ਜਾ ਰਹੇ ਹਨ | ਵਿਰੋਧੀ ਧਿਰਾਂ ਨੇ ਇਸ ਸੂਚੀ ਦਾ ਵਿਰੋਧ ਕਰਦਿਆਂ ਕਿਹਾ ਕਿ ਸਰਕਾਰ ਉਨ੍ਹਾਂ ਤੋਂ ਆਲੋਚਨਾ ਦਾ ਅਧਿਕਾਰ ਖੋਹ ਰਹੀ ਹੈ | ਕਾਂਗਰਸੀ ਨੇਤਾ ਰਾਹੁਲ ਗਾਂਧੀ ਨੇ ਟਵਿੱਟਰ ‘ਤੇ ਪਾਏ ਸੰਦੇਸ਼ ‘ਚ ਅਸੰਸਦੀ ਸ਼ਬਦ ਦੀ ਪਰਿਭਾਸ਼ਾ ਦਿੰਦਿਆਂ ਕਿਹਾ ਕਿ ਚਰਚਾ ਅਤੇ ਬਹਿਸ ‘ਚ ਵਰਤੇ ਉਹ ਸ਼ਬਦ, ਜੋ ਸਰਕਾਰ ਚਲਾਉਣ ਦੇ ਪ੍ਰਧਾਨ ਮੰਤਰੀ ਦੇ ਢੰਗ ਤਰੀਕੇ ਦੱਸਦੇ ਹੋਣ, ਹੁਣ ਉਨ੍ਹਾਂ (ਸ਼ਬਦਾਂ) ਨੂੰ ਬੋਲਣ ‘ਤੇ ਪਾਬੰਦੀ ਲਗਾਈ ਗਈ ਹੈ | ਰਾਹੁਲ ਗਾਂਧੀ ਨੇ ਇਸ ਪਰਿਭਾਸ਼ਾ ਦੇ ਨਾਲ ਨਵੇਂ ਭਾਰਤ ਦੀ ਨਵੀਂ ‘ਡਿਕਸ਼ਨਰੀ’ ਲਿਖਦਿਆਂ ਜੁਮਲਾਜੀਵੀ, ਤਾਨਾਸ਼ਾਹ, ਮਗਰਮੱਛ ਅੱਥਰੂ ਜਿਹੇ ਸ਼ਬਦਾਂ ਦੀ ਮਿਸਾਲ ਵੀ ਦਿੱਤੀ | ਸੂਚੀ ਨੂੰ ਲੈ ਕੇ ਉੱਠੇ ਵਿਵਾਦ ਤੋਂ ਬਾਅਦ ਲੋਕ ਸਭਾ ਸਪੀਕਰ ਬਿਰਲਾ ਨੇ ਅਗਲੇ ਹੀ ਦਿਨ ਪ੍ਰੈੱਸ ਕਾਨਫ਼ਰੰਸ ਕਰਕੇ ਇਸ ਨੂੰ ਅਮਲ ਦਾ ਹਿੱਸਾ ਦੱਸਦਿਆਂ ਕਿਹਾ ਕਿ ਇਸ ‘ਚ ਸਰਕਾਰ ਦੀ ਕੋਈ ਦਖ਼ਲਅੰਦਾਜ਼ੀ ਨਹੀਂ ਹੈ | ਬਿਰਲਾ ਨੇ ਕਿਹਾ ਕਿ 1959 ਤੋਂ ਇਹ ਅਮਲ ਚੱਲਿਆ ਆ ਰਿਹਾ ਹੈ | ਹੁਣ 2010 ਤੋਂ ਬਾਅਦ ਇਹ ਸੂਚੀ ਹਰ ਸਾਲ ਕੱਢੀ ਜਾਂਦੀ ਹੈ | ਬਿਰਲਾ ਨੇ ਕਿਹਾ ਕਿ ਕਿਸੇ ਤੋਂ ਬੋਲਣ ਦਾ ਅਧਿਕਾਰ ਨਹੀਂ ਖੋਹਿਆ ਜਾ ਰਿਹਾ |